समाचार सारांश
- खोटाङमा एयर डाइनेस्टिको हेलिकोप्टर दुर्घटना हुँदा एक जना घाइते भएका छन् भने अन्य सबै सकुशल रहेका छन्।
- दुर्घटनामा हेलिकोप्टरमा लास नभएको पुष्टि भएको छ, मृतकको शव गाडीमार्फत पठाइएको थियो।
- ल्यान्ड गर्ने क्रममा हेलिकोप्टर उछिट्टिएर भित्तामा ठोक्किँदा दुर्घटना भई हेलिकोप्टर क्षतविक्षत भएको हो।
खोटाङ : खोटाङमा भएको हेलिकोप्टर दुर्घटनामा कसैको ज्यान गएको छैन, एक जना घाइते भएका छन् । सुरुमा लास लिएर आएको हेलिकोप्टर दुर्घटना भएको भनिए पनि दुर्घटनाग्रस्त हेलिकोप्टरमा लास नभएको जिल्ला प्रहरी कार्यालय खोटाङका प्रमुख डिएसपी प्रकाश बुढाथोकीले बताए ।
हेलिकोप्टरमा लास राखिएको बाकस नअटेपछि लास गाडीबाट पठाएर मृतकका आफन्त हेलिकोप्टरमा गाउँ आएको पाइएको डिएसपी बुढाथोकीले बताए । शवको दाहसंस्कार गर्न गाउँ आएका स्थानीय चढेको हेलिकोप्टर केपिलासगढी गाउँपालिका–२, खार्ताम्छाको बालाबेसीमा चैत ४ गते दिउँसो १२ बजे दुर्घटना भएको हो ।
काठमाडौँबाट बालाबेँसी पुगेर ल्यान्ड गर्ने क्रममा एयर डाइनेस्टिको हेलिकोप्टर दुर्घटनामा परेको हो । सुरुमा बारीको डिलमा बसेको हेलिकोप्टरलाई पुःन उठाएर बारीको बिचमा सार्न खोज्दा उछिट्टिएर माथिल्लो गह्राको भित्तामा बजारिएको थियो । जमिनमा घिसारिदै भित्तामा बजारिएको हेलिकोप्टर क्षतविक्षत भएको छ ।
हेलिकोप्टरमा चालक सविन थापासहित डाकमणि राई, बालकुमार राई, समला राई लक्ष्मी राई, काजीबहादुर राई रहेको डिएसपी बुढाथोकीले बताए । दुर्घटनामा काजिमान राई घाइते भएका छन् । अन्य यात्रु सकुशल रहेका छन् । घाइते काजिमानलाई उपचारका लागि अर्को हेलिकोप्टर मगाएर काठमाडौँ लगिएको छ ।
घाइते काजिमानसँगै दुर्घटना भएको हेलिकोप्टरका चालक थापा पनि सोही हेलिकोप्टरमा काठमाडौँ गएका छन् । दुर्घटना भएर क्षतविक्षत भएको हेलिकोप्टर घटनास्थलमै रहेको छ ।
