बर्दिया : खरखडाई गर्न गएका बर्दिया मधुवन नगरपालिका—३ का ७० वर्षीय पुरुषलाई गैंडाले आक्रमण गर्दा घाइते भएका छन् । खाता जैविक मार्गको गौरी सामुदायिक वनमा गैंडाले आक्रमण गर्दा सोही ठाउककका गहुनु चौधरी गम्भीर घाइते भएको डिभिजन वन कार्यालयका प्रमुख प्रविण बिडारीले बताए ।
गैंडाले चौधरीको शरीरको विभिन्न अंगमा प्रहार गरेको थियो । गैंडाको आक्रमणमा चौधरीको हात र पेटमा खागबाट आक्रमण भएको उनले जनाए । घाइते चौधरीलाई उपचारका लागि गुलरियास्थित जिल्ला अस्पतालमा ल्याएको थियो ।
उनको उपचार यहाँ हुन नसकेपछि कोहलपुरस्थित नेपालगञ्ज शिक्षण अस्पतालमा भइरहेको डिभिजन वन कार्यालय, बर्दियाले जनाएको छ । उक्त घटना सदरमुकाम गुलरियादेखि करिब २५ किलोमिटर पश्चिममा पर्दछ ।
