काठमाडौं, आउँदो शुक्रवार अर्थात् भोलिबाट यम थापा निर्देशित चलचित्र ‘मेरी मामू’ रिलिज हुँदैछ । फिल्म युनिट यतिबेला देशका विभिन्न स्कूल र स्थानमा पुगेर अन्तर्क्रिया गरिरहेको छ । फिल्ममार्फत सन्तोष सेनले आफ्ना छोरा आयुब सेनलाई डेब्यु गराउँदैछन् ।
फस्ट लूक सार्वजनिक भएसँगै चर्चामा रहँदै आएको यो फिल्म एक आमा छोराको कथामा निर्माण गरिएको फिल्म भनिएको छ । चलचित्रमा लेखन तथा निर्देशन यम थापाको छ भने सन्तोष सेनले निर्माण गरेका छन् ।
थापाले यसअघि ‘राज्जारानी’ निर्देशन गरेका थिए । यता सन्तोष सेनले चंखे शंखे पंखे, प्रेम गीत र प्रेम गीत २ निर्माण गरेका थिए ।
आयुबसँगै कुसुम गुरुङको पनि यतिबेला चर्चा छ । फिल्ममा सारुक ताम्राकार, अश्लेषा ठकुरी, भुवन चन्द, दुर्गा मल्ल लगायतले समेत अभिनय गरेका छन् ।
फरक स्वादको भनिएको यो फिल्मले दर्शकको ध्यान खिच्नेछ भन्नेमा निर्माण टिम ढुक्क छ र त्यही अनुसार आफ्ना टार्गेट अडियन्समाझ फिल्मले प्रचार पनि गरेको छ ।
आयुब सेनको अभिनयको रिलिजअघि त राम्रै चर्चा भएको छ । तर, फिल्म कस्तो बनेको छ र अडियन्सले रुचाउनेछन् या छैनन् भन्ने अब केही दिनमै थाहा होला । फिल्मको प्रचार हुनु तर फिल्म नचल्नु त नेपाली फिल्मको विशेषता जस्तै भइसक्यो ।
