समाचार सारांश
- नेपालगञ्ज–गुलरिया सडक खण्डको किरण नालामा चार लेन सडकअनुसार नयाँ दुई लेनको थप पुल निर्माण सुरु गरिएको छ।
- सवारी दुर्घटना बढेपछि करिब ४ करोड ५० लाख लागतमा नयाँ पुल निर्माण थालिएको हो।
- असारभित्र निर्माण सम्पन्न गर्ने लक्ष्य राखिएको छ, जसले यातायातलाई सहज बनाउनेछ।
खजुरा : नेपालगञ्ज–गुलरिया सडक खण्ड अन्तर्गत खजुरा र जानकी गाउँपालिकाको सीमास्थित किरण नालामा थप पुल निर्माण सुरु भएको छ । चार लेनको सडक रहेकोमा यसअघिको पुल दुई लेनको मात्र भएकाले सडक विस्तारसँगै पुल पनि थप गरिएको हुलाकी राजमार्ग निर्देशनालय योजना कार्यालय नेपालगञ्जका योजना प्रमुख लीलाबहादुर भण्डारीले जानकारी दिए ।
भण्डारीले भने, ‘सो स्थानमा सवारी दुर्घटनाका घटना बढ्न थालेपछि नयाँ पुल निर्माण कार्य अघि बढाइएको हो । दुई वटा पुल भएपछि चार लेन सडकमा सवारी आवागमनमा थप सहजता हुने छ ।’
करिब चार करोड ५० लाखको लागतमा पुल निर्माण कार्य सुरु भएको हो । हाल धमाधम जग निर्माणको काम भइरहेको छ । केही वर्षअघि मात्र निर्माण भएको दुई लेन सवारी सञ्चालन हुने पुल साँघुरो भएपछि सोही स्थानमा दुई लेनको अर्को पुल निर्माण सुरु गरिएको छ ।
पुरानो दुई लेनको पुल यथावत राखेर नयाँ थप दुई लेनको पुल बनाउन लागिएको छ । आगामी असारभित्रै पुल निर्माण सक्नेगरि काम भइरहेको हुलाकी राजमार्ग निर्देशनालय योजना कार्यालय नेपालगञ्जले जनाएको छ ।
यसैगरी बर्दियाको बढैयाताल गाउँपालिकामा पर्ने चपला नालामा रहेको पुल पनि चार लेनको बनाइने योजना कार्यालयले जनाएको छ ।
