नेपालगञ्ज : नागरिक उड्डयन प्राधिकरणका महादिर्शेक प्रदीप अधिकारीले नेपालगञ्जबाट भारतका केही ठुला सहरहरुमा छिटै हवाई उडान सुरु गरिने बताएका छन् । बाँकेको नेपालगञ्जस्थित राँझा विमानस्थलमा निर्धारित समयभन्दा दुई महिना पहिलेनै निर्माण सम्पन्न गरिएको सुविधायुक्त नयाँ टर्मिनल भवनको शुक्रवार अनुगमन निरीक्षण गर्दै उनले यस्तो बताएका हुन् ।
महादिर्शेनक अधिकारीले अन्तर्राष्ट्रिय उडान गर्ने गरी यो नयाँ टर्मिनल भवन निर्माण गरिएको जनाउँदै अब छिटै उडान शुरु गर्ने प्रक्रिया पनि सुरु गरिने बताए । उनले यो विमानस्थलमा अहिले उडान भरिरहेका विभिन्न कम्पनीका विमानबाटै भारतको लखनउ, दिल्ली र बनारस लगायतका सहरहरुमा उडान गर्न सकिने भएकोले त्यसको प्रक्रिया सुरु गरिने बताए । सो सम्बन्धमा यसअघिबाट नै नेपाल र भारत सरकारका बिच छलफल भइरहेको जनाउँदै महानिर्देशक अधिकारीले टर्मिनल भवन निर्माणबाट सो कार्य छिटै सम्भव हुने बताए ।
नागरिक उड्डयन प्राधिकरणका महानिर्देशकसहितको टोलीलाई टर्मिनल भवनको बारेमा निर्माण कम्पनी शर्मा एण्ड कम्पनीका प्रमुख रमेश शर्मा र नेपालगञ्ज विमानस्थल टर्मिनल भवन आयोजनाका प्रमुख नलविक्रम थापाले जानकारी गराएका थिए । अनुगमन टोलीमा नागरिक उड्डयन प्राधिकरणका निर्देशक दीपेन्द्र श्रेष्ठ लगायतको सहभागिता थियो । सो टोलीले निरिक्षण गरेर सबै ठिक छ भनेपछि मात्र टर्मिनल भवन हस्तान्तरण गरिने निर्माण कम्पनी शर्मा एण्ड कम्पनीका अध्यक्ष रमेश शर्माले बताए ।
भ्याट बाहेक कुल दुई अर्ब ७४ करोड २० लाख १८ हजार ९९३ रुपियाँको लागतमा टर्मिनल भवन निर्माण गरिएको हो । २०७९ पुसबाट काम सुरू गरेको निर्माण कम्पनीले तीन वर्ष अर्थात् २०८२ पुसमा काम सक्ने गरी काम सकारेको थियो । तर यो कम्पनीले दुई महिना अगाडि नै निर्माण कार्य पूरा गरेको हो । नवनिर्मित टर्मिनल भवन सेमी बेसमेन्टसहित तीन तलाको छ । जसको बेसमेन्ट कमर्सियल प्रयोजनका लागि निर्माण गरिएको छ । जहाँ कुल २४ वटा पसल रहनेछन् ।
पाँच हजार ७५ स्क्वायर मिटरको क्षेत्रफल ओगटेको टर्मिनल भवनभित्र यात्रु चेकिङ काउन्टर १४ वटा, भिआइपी रूम तीन वटा, चिल्ड्रेन प्लेइङ एरिया एउटा, भन्सार र क्वारेन्टाइन चेकजाँचका लागि अलग÷अलग कोठाहरू निर्माण गरिएका छन् । भविष्यमा अन्तर्राष्ट्रिय उडान हुने सम्भावनालाई दृष्टिगत गर्दै घरेलु र अन्तर्राष्ट्रिय उडानका लागि अलग÷अलग यात्रु प्रस्थान र आवागमन ढोकाहरू तयार गरिएको छ । पिकआवरमा नवनिर्मित टर्मिनल भवनको यात्रु क्षमता प्रति घण्टा ६ सय २८ छ ।
नयाँ टर्मिनल भवनभित्र बगैंचाका साथै पाँचदेखि १४ मिटर फराकिलो बाटो निर्माण गरिएको छ । टर्मिनल भवनको पेरिफेरिमा ढल निकास तथा बढी भएको पानी निकासका लागि उचित नालाको विकास गरिएको छ । सो नयाँ टर्मिनल भवन क्षेत्रमा एप्रोन अर्थात् जहाज पार्किङ गर्ने ठाउँ पनि निर्माण गरिएको छ । जसमा एटिआर–७२ जहाज ३ वटा र ट्विअटर जहाज ५ वटा एकै पटकमा पार्किङ गर्न मिल्ने सुविधा छ ।
त्यस्तै, नयाँ टर्मिनल भवनको परिसरमा सवारी साधन पार्किङको छुट्टै ठाउँ पनि निर्माण गरिएको छ । त्यहाँ मोटरसाइकल १५५, इभी गाडी चार्जिङ स्टेसनसहित १० गाडी, फोर ह्विल सानो गाडी १०२, बसहरू पाँच वटा, अटो रिक्सा ३० वटा पार्किङ गर्ने पार्किङस्थल निर्माण गरिएको छ ।
