नेपालगञ्ज : मोटरसाइकलको ठक्करबाट नेपालगञ्जमा एक जना पुरुष घाइते भएका छन् । मंगलवार राती साढे ९ बजे तिर नेपालगञ्ज वडा नम्बर १० को कार्यालय अगाडी तीब्र गतिमा आएको भे १० प ५९६६ नम्बरको मोटरसाइकल पैदल यात्रुलाई ठक्कर दिएको जिल्ला प्रहरी बाँकेले जानकारी दिएको छ ।
मोटरसाइकलको ठक्करबाट नेपालगञ्ज १० आदर्शनगर बस्दै आएका लम्कीचुहा ४ कैलालीका अन्दाजी ५५ बर्षका पुरुष नारायण जोशी घाइते भएका हुन् । घाइतेको जोशीको टाउकोमा चोट लागेको छ ।
गणेशमान चोकदेखि ट्राफिक चोक तिर जाँदै गरेको उक्त मोटरसाइकलले बाटोको आफ्नै साइडमा हिडिरहेका जोशीलाई ठक्कर दिई फरार हुन खोजेको मोटरसाइकललाई लिएको स्थानीयहरुले बताएका छन् ।
अहिले उनको नेपालगन्ज मेडिकल कलेज नेपालगञ्जमा उपचार भइरहेको प्रहरीले जानकारी दिएको छ । ठक्कर दिने मोटरसाइकल र चालकलाई जिल्ला प्रहरी बाँकेले नियन्त्रणमा लिएको जानकारी दिएको छ ।
