नेपालगञ्ज : दार्चुलाका विभिन्न भेगमा गएराति बाढीपहिरोमा परी तीन जनाको मृत्यु भएको छ । अन्य दुई जना बेपत्ता भएका छन् ।
पहिरोले घर पुरिँदा दुहु गाउँपालिका–१ बासपालिकामा नरसिंह महर र उनकी श्रीमती कौशिला महरको मृत्यु भएको जिल्ला प्रहरी कार्यालय दार्चुलाका प्रहरी नायब उपरीक्षक मनोहर भट्टले जानकारी दिए ।
यस्तै दुहु गाउँपालिकाको वडा नम्बर ५ दुल्लामा बाढीले बगाउँदा मनुवा डडालको पनि मृत्यु भएको छ । कालागाड खोलामा आएको बाढीले डडाललाई घरसहित बगाएको थियो ।
यस्तै वडा नम्बर ३ निजाङगाडमा खोलाको बाढीले बगाउँदा स्थानीय शेरसिंह कार्की र हरकसिंह कार्की बेपत्ता भएको प्रहरी नायब उपरीक्षक भट्टले बताए । सो क्षेत्रमा ५ वटा पसल, दुईवटा लघु जलविद्युत् आयोजना, चारवटा झोलुंगे पुल र एउटा पक्की पुल पनि बगेको स्थानीयले बताएका छन् ।
