दाङ्ग : दाङ्गमा मलामी गएका एक व्यक्तिको बबई नदीले बगाउँदा मृत्यु भएको छ । दंगिशरण गाउँपालिका वडानं. १ बाँकीका ५० वर्षीय वामदेव देवकोटाको बबई नदीमा आएको बाढीले बगाउँदा मृत्यु भएको इलाका प्रहरी कार्यालय तुलसीपुरका प्रमुख डिएसपी श्यामु अर्यालले बताए ।
देवकोटालाई शुक्रबार बिहान दश बजेतिर बाँकेस्थित निर्माणाधीन बबई पुल नजिकबाट बगाएको र पाँच सय मिटर दक्षिणको बैबाङमा शव फेला परेको डिएसपी अर्यालले जानकारी दिए । गाउँकै एक जना मानिसको मृत्यु पछि गाउँलेहरू मलामी गएका बेला देवकोटा नुहाउन बबईमा पसेपछि बाढीले बगाएको डिएसपी अर्यालले जानकारी दिए ।
मलामी गएका मानिसहरू घर फर्किने क्रममा परम्परा अनुसार नुहाउने प्रचलन छ । नुहाउने क्रममा बाढीमा बगेका उनको स्थानीयले शव निकालेका थिए । देवकोटा दंगिशरण १ बाँकीका ९० वर्षीय दिलबहादुर रानाको मृत्यु भएपछि गाउँले सँगै मलामी गएका थिए ।
