कोहलपुर (बाँके) : कोहलपुरमा एक जना बाबुले आफ्नै छोराको हत्या गरेका छन् । कोहलपुर वडा नं. १२ चप्परगौडिमा बुधबार राती करिब सवा ९ बजे बाबुले छोरोलाई घरेलु हतियार प्रहार गरि हत्या गरेको कोहलपुर प्रहरीले जनाएको छ ।
चप्परगौडी बस्दै आएका ठाकुरप्रसाद ओलीले अन्दाजी १९ बर्षका आफ्नै छोरा पोषण ओलीको बुधबार राति हत्या गरेको ईलाका प्रहरी कार्यालय कोहलपुरका प्रहरी निरीक्षक होमप्रकाश चौधरीले जनाएका छन् ।
घरमा नुहाईरहेका बेला घरेलु हतियारले पछाडिबाट हानेर छोराको हत्या गरेको स्थानीयले बताएका छन् । खसी काट्ने दापले प्रहार गरेपछि गम्भीर घाईते भएका छोरोलाई भेरी अस्पताल नेपालगञ्ज पुर्याए लगत्तै अस्पतालले मृत घोषणा गरेको थियो ।
घरायसी झगडाका कारण हत्या भएको हुनसक्ने प्रहरीले प्रारम्भिक अनुसन्धानबाट खुलेको जनाएको छ । हत्या गर्ने बाबू ओलीलाई कोहलपुर प्रहरीले घरबाटै नियन्त्रणमा लिएको जनाएको छ ।
