म्याग्दी : म्याग्दीको बेनी नगरपालिका ४ फापरखेतमा जीप दुर्घटना हुँदा एक जनाको मृत्यु भएको छ । मालिका गाउँपालिका–३ पात्लेबाट बिरामी लिएर बेनीतर्फ आउँदै गरेको ग १ ज ६७८८ नम्बरको जिप बिहीवार राति सडकबाट म्याग्दी नदीमा खसेर दुर्घटना भएको हो ।
सो दुर्घटनामा परेर मालिका–३ का ६२ वर्षीय गोविन्द रोकाको मृत्यु भएको जिल्ला प्रहरी कार्यालय म्याग्दीका प्रहरी नायब उपरीक्षक श्यामकुमार राईले जानकारी दिए । दुर्घटनामा गम्भीर घाइते भएको रोकाको बेनी अस्पतालमा उपचारका क्रममा मृत्यु भएको हो ।
उनका अनुसार रुखबाट लडेर घाइते भएका मालिका–१ निस्कोटका ३० वर्षीय नरबहादुर रोकालाई थप उपचारका लागि पोखरा लैजाँदै गरेको जिप दुर्घटना भएको हो ।
जिप दुर्घटनामा परेर घाइते भएका मालिका–३ पात्लेका २९ वर्षीय रवीन्द्र रोका, २० वर्षीया रेजिना रोका र ३८ वर्षीय खगेन्द्र रोकाको बेनी अस्पतालमा उपचार भइरहेको राईले बताए । चालक बाहेक अरू सबै एकै परिवारका सदस्य रहेको प्रहरीले जनाएको छ । दुर्घटनाबारे थप अनुसन्धान थालिएको प्रहरीले जनाएको छ ।
