बैतडी : चमेलिया नदी किनारमा शुक्रवार बिहान मृत अवस्थामा फेला परेकी महिलाको शव पहिचान भएको छ । त्यो शव दार्चुलाको शैल्यशिखर नगरपालिका ६ उलानीका ४० वर्षीया सरिता धामीको भएको बैतडीका प्रहरी प्रमुख, प्रहरी नायव उपरीक्षक नारायणप्रसाद अधिकारीले जानकारी दिए ।
ती महिला आज बिहान ८ बजे बैतडीको दोगडाकेदार गाउँपालिका ६ चम्तडीस्थित चमेलिया नदी किनारमा मृत अवस्थामा फेला परेकी हुन्। बिहान स्थानीय नैनसिंह गोयलाले नदी किनारमा महिलाको शव देखेपछि प्रहरीलाई खबर गरेका थिए ।
सरिता बिहीबार बिहान घरबाट एक्कासि बेपत्ता भएकी घरपरिवारले बताएको प्रहरीले जनाएको छ । घटनाको थप अनुसन्धान भइरहेको जिल्ला प्रहरी कार्यालय बैतडीले जनाएको छ । मृतक महिलाका श्रीमान, १ छोरा र १ छोरी रहेका प्रहरीले बताएको छ ।
