सदरलाइनडटकम,
नेपालगञ्ज : यमपञ्चक अर्थात् तिहारको चौथो दिन बिहीवार गोबर्धन र गोरुको पूजाआजा गरी मनाइँदैछ । गाईलाई लक्ष्मीको प्रतीकका रुपमा सिंग र खुरमा तेल तथा जीउमा रातो पहेंलो छाप लगाई बुधवार पूजा गरेपछि बिहवार गोरु पूजा गर्ने प्रचलन छ ।
नेपालका कतिपय भाग र केही समुदायमा कात्तिक कृष्ण औंसीकै दिनमा गाई पूजा गर्ने परम्परा रहे पनि औँसीको अन्त्य र प्रतिपदाको शुरुमा गाई पूजा गर्नुपर्ने शास्त्रीय मान्यता छ । यसैगरी आजै गोर्वधन पूजा पनि गरिँदैछ ।
गाईको गोबरबाट गोवर्धन पर्वत बनाई पूजा गर्ने हिन्दु परम्परा छ । भगवान कृष्णले गोवर्धन पर्वत उठाएर गोकुलबासीलाई ठूलो बर्षाबाट जोगाएर इन्द्रको घमण्ड तोडेको बिश्वासका साथ गोवर्धन पूजा गरिन्छ ।
यस्तै वर्षभरि हलो र गाडा तानेर मानिसको उपकार गरेको गोरुको पनि आजै पूजा गरिन्छ । गोरुलाई पनि पूजागरि माला लगाईदिएर मिठो मिठो परिकार खान दिने प्रचलन छ ।
यसैगरी नेपालको तराई क्षेत्रमा र भारतमा बिहीवार अन्नकूट मनाईंदैछ । ५६ प्रकारको ब्यञ्जन (भोजन) बनाएर भगवानलाई भोग लगाइन्छ । यसरी लगाइएको भोग भक्तजनहरुलाई प्रसादको रुपमा दिईन्छ ।
