नेपालगञ्ज : बाँकेको कोहलपुर–११ स्थित लोकनगरमा एकीकृत डाटा सेन्टर निर्माणकाे अन्तिम चरणमा रहेकाे पुगेकाे छ । डिजिटल संसारको मेरुदण्ड मानिने डाटा सेन्टरलाई अहिले अन्तिम रूप दिने काम भईरहेका निर्माण कम्पनीका पोजेक्ट म्यानेजर कार्तिक झाले जानकारी दिए ।
निर्माण कम्पनीका पोजेक्ट म्यानेजर झाका अनुसार एकीकृत डाटा सेन्टर निर्माणको ९६ प्रतिशत काम सम्पन्न भइसकेको छ । ४६ करोड लागतमा कोहलपुरमा एकीकृत डाटा सेन्टर निर्माण गरिएको हो । संघीय सरकारको पञ्जीकरण विभाग अन्तर्गत रहेको डाटा सेन्टर प्रादेशिक कार्यालय हो । यस कार्यालयले लुम्बिनी प्रदेश अन्तर्गत मात्रै सेवा प्रवाह गर्नेछ ।
कार्यालय सञ्चालनमा आएपछि डाटा संकलन र भण्डारको काम गर्नेछ । समान्तार रेलिगेड जेभीले उक्त डाटा सेन्टर निर्माण गरेको हो । पोजेक्ट म्यानेजर झाले भने,–‘डाटा सेन्टरका लागि भौतिक संरचना निर्माण सम्पन्न भइसकेको छ । ती संरचनालाई हस्तान्तरण गर्नको लागि अन्तिम रूप दिने तयारीमा छौं । अबको एक महिनाभित्रै भवन सरकारलाई हस्तान्तरण गर्छौं ।’
डाटा सेन्टर निर्माणको काम २०७९ असार २० गतेदेखि निर्माण सुरु भएको थियो । निर्माण सुरु भएको दुई वर्षभित्रै कार्य सम्पन्न गर्ने योजनासहित समान्तार रेलिगेड जेभीले डाटा सेन्टर निर्माणको जिम्मा पाएको थियो । आफूहरूले निर्धारित समयमै योजना सम्पन्न गरेको झाको भनाइ छ ।
लोकनगरमा एक बिघा क्षेत्रफलमा डाटा सेन्टरको लागि मेन ब्लक निर्माण गरिएको छ । मेन ब्लकमा १६ वटा कोठा रहेका छन् । सुविधा सम्पन्न सर्भर रुमसमेत निर्माण गरिएको छ । यस्तै एउटा स्टाफ क्वाटरसमेत निर्माण गरिएको छ । सुरक्षा गार्ड पोष्टसमेत निर्माण सम्पन्न भइसकेको छ ।
पञ्जीकरण विभाग अन्तर्गत रहेको यो कार्यालय काठमाडौँ उपत्यका बाहिर रहेका दुई वटा कार्यालयमध्ये एक हो, हाल हेटौंडा र कोहलपुरमा निर्माण गरिएका कार्यालय निर्माणको अन्तिम तयारीमा छन् ।
ठूलो मात्रामा डाटा भण्डारण, प्रशोधन र वितरण गर्न कम्प्युटर प्रणाली र नेटवर्किङ उपकरणहरू राखिएको सुविधा नै डाटा सेन्टर हो । यसमा सर्भरहरू, स्टोरेज सिस्टमहरू, नेटवर्किङ उपकरणहरू, कुलिङ सिस्टमहरू, पावर सप्लाई र सुरक्षा प्रणाली जस्ता डाटा सेन्टरका मुख्य घटकहरू हुन्छन् ।
एन्टरप्राइज डाटा सेन्टरहरू, कोलोकेशन डाटा सेन्टरहरू र क्लाउड डाटा सेन्टर गरि डाटा सेन्टरहरू तीन प्रकारका रहेका छन् । कोहलपुरमा सञ्चालन हुने डाटा सेन्टरले ब्लूबुक, लाइसेन्स, राष्ट्रिय परिचयपत्रसहितका अन्य डाटा खरिद् र संकलन गर्नेछ ।
