नेपालगञ्ज : बाँकेको खजुरास्थित सुशील कोइराला प्रखर क्यान्सर अस्पतालले खजुरा गाउँपालिकाका स्थायीबासीलाई ओपिडी सेवा निःशुल्क दिने भएको छ । नवनियुक्त अस्पताल विकास समितिले खजुरा गाउँपालिकाबासी विरामीलाई ओपिडी सेवा निःशुल्क दिने निर्णय गरेको अस्पताल विकास समितिका अध्यक्ष किशोर थापाले जानकारी दिए ।
अस्पताल स्थापनाका लागि खजुराबासीले आर्थिकरुपमा ठूलो सहयोग गरेको स्मरण गर्दै अध्यक्ष थापाले अस्पतालले ओपिडी सेवा निःशुल्क गर्दै आफ्नो नैतिक जिम्मेवारी निर्वाह गरेको बताए ।
अस्पताल स्थापनाका लागि आयोजना गरिएको महायज्ञमा खजुराबासीहरुले आर्थिक सहयोग गरेका थिए । नवनियुक्त विकास समितिले बुधवार पदभार ग्रहण गरेको छ ।
