
नेपालगञ्ज : बाँकेमा लागुऔषधको अवैध कारोबार तथा ओसारपसार नियन्त्रण प्रहरीका लागि चुनौती बन्दै गएको छ । खुला भारतीय सीमाका कारण लागुऔषधको कारोबार बढ्दै गएको अवस्थामा बाँके प्रहरीले चालु आर्थिक वर्षको पहिलो तीन महिनामा मात्रै चार किलोभन्दा बढी ब्राउनसुगर बरामद गर्न सफल भएको छ ।
लागुऔषधको जोखिम उच्च रहेको बाँकेमा प्रहरीले विशेष अभियान सञ्चालन गरि चालु आर्थिक वर्षको करिव ४ महिनामा चार किलो एकसय ९० ग्रामभन्दा बढी ब्राउनसुगर बरामद गर्न सफल भएको बाँके प्रहरी प्रवक्ता प्रहरी नायव उपरिक्षक प्रतित सिंह राठौरले जानकारी दिए ।
खुला सीमा, सीमापार लागुऔषधको सहज उपलब्धता र ठूलो संख्यामा हुने आवतजावतका कारण बाँके लागुऔषध ओसारपसारको जोखिममा रहेको उनको भनाइ छ । उनले लागूऔषध विरुद्धको सचेतनाको अभियान सञ्चालन गरी न्यूनिकरणको प्रयास गरिएको बताए ।
बाँके प्रहरीले ब्राउनसुगरसँगै अन्य लागुऔषधको बरामदको मात्रा पनि बढी रहेको जानकारी दिदै ४ किलो १९० ग्राम ब्राउनसुगर, १३ किलोभन्दा बढी अफिम, करिब दुई किलो गाँजा, तीन सय ग्रामभन्दा बढी चरेश तथा १४ लिटर कोरेक्स, पाँच हजारभन्दा बढी नाइट्रोजेपाम ट्याबलेट र ४३ हजार १९९ क्याप्सुल ट्रामाडोल बरामद गर्न सफल भएको छ ।
अघिल्ला दुई आर्थिक वर्षको चारमहिनाको लागू औषध बरामद र कारोवारी पक्राउको तथ्याङ्क हेर्दा बढ्दो क्रममा देखिनुले चुनौती थपिएको छ । प्रहरीले लागुऔषध नियन्त्रणका लागि अभियान सञ्चालन गरिरहे पनि बरामदको बढ्दो मात्रा र कारोबारमा संलग्न व्यक्तिको सङ्ख्याले समस्या गम्भीर बन्दै गएको संकेत गर्छ ।
लागुऔषधको आपूर्ति नियन्त्रणसँगै यसको प्रयोग रोकथाम, जनचेतना र उपचार तथा पुनःस्थापनालाई प्रभावकारी बनाउन सके मात्रै बाँकेमा लागुऔषधको चुनौती न्यूनीकरण गर्न सकिने देखिन्छ ।


प्रतिक्रिया दिनुहोस्