
नेपालगञ्ज : कर प्रणालीलाई पारदर्शी, न्यायपूर्ण र व्यवस्थित बनाउन राज्य तथा निजी क्षेत्रबीच सहकार्य आवश्यक रहेको एक कार्यक्रमका सहभागीले औल्याएका छन् ।
आन्तरिक राजस्व कार्यालय नेपालगञ्जले आयोजना गरेको कर सप्ताह २०८३ को सुरुवात गर्दै सो कुरा औल्याएका हुन । कार्यक्रममा बाँकेका प्रमुख जिल्ला अधिकारी दिलकुमार तामाङ्गले कर सप्ताहले करप्रतिको सचेतना अभिवृद्धि गर्नुका साथै कर तिर्ने संस्कृतिको विकासमा योगदान पुर्याउने विश्वास व्यक्त गरे ।
नेपालगञ्ज उद्योग बाणिज्य संघका अध्यक्ष चिरञ्जिवी वलीले कर प्रणालीलाई पारदर्शी, न्यायपूर्ण र व्यवस्थित बनाउन राज्य तथा निजी क्षेत्रबीच सहकार्य आवश्यक रहेको बताए । उनले कर तिर्न सहज बाताबरण राज्यले बनाउनु पर्ने कुरामा जोड दिए ।
कार्यक्रममा आन्तरिक राजस्व कार्यालय नेपालगञ्जका प्रमुख कर अधिकृत प्रेमप्रसाद उपाध्यायले करदातालाई करसम्बन्धी सचेतना अभिवृद्धि गरिने बताउदै व्यवसायीहरुसंग सहकार्य गरी उहाँहरुलाई अझबढी जिम्मेवार बनाईने प्रष्ट पारे । उनले कार्यालयले कर मैत्री बाताबरणमा सेवा प्रवाह गर्दै आएको जानकारी पनि दिए ।
यस वर्ष ‘कर न्याय र सुशासनको सुनिश्चितता : समृद्धिमा नागरिक सहभागिता’ भन्ने मूल नाराका साथ मंसिर १ देखि ७ गतेसम्म राष्ट्रिय कर दिवस तथा कर सप्ताह मनाइँदैछ ।
कर अधिकृत किरण डाँगीले स्वागत गरेको कार्यक्रम कर अधिकृत राजेन्द्र बहादुर खड्काले सञ्चालन गरेका थिए । कार्यक्रममा नेपालगञ्ज भन्सार कार्यालयका प्रमुख राजेन्द्र बस्नेत, नेपाल लेखामान बोर्डका सदस्य अब्दुल करिम खाँ, अडानका केन्द्रीय सचिव मो. जुबेर राई, आइक्यान बाँकेका अध्यक्ष प्रभञ्जन रेग्मी, अडानका अध्यक्ष भुवनप्रकाश गैह्रे तथा नेपाल पत्रकार महासंघ बाँकेका अध्यक्ष नवीन गिरी लगायतले शुभकामना मन्तव्य व्यक्त गरेका थिए ।
राष्ट्रिय कर दिवस तथा कर सप्ताह २०८३ को शुभारम्भका अवसरमा मंगलबार बिहान नेपालगञ्जमा प्रभातफेरि गरिएको छ । आन्तरिक राजस्व कार्यालय नेपालगञ्जको आयोजनामा करसम्बन्धी सचेतना अभिवृद्धि गर्ने उद्देश्यले प्रभातफेरि गरिएको हो ।
आन्तरिक राजस्व कार्यालय परिसरबाट सुरु भएको प्रभातफेरि बीपी चोक, धम्बोझी चोक, सेतु विक चोक, न्युरोड, त्रिभुवन चोक, चारबाहिनी चोक र गणेशमान चोक हुँदै पुनः कार्यालय परिसरमा पुगेर समापन भएको थियो ।
प्रभातफेरिपछि कार्यालय प्रमुख एवं प्रमुख कर अधिकृत उपाध्यायको अध्यक्षता तथा बाँकेका प्रमुख जिल्ला अधिकारी तामाङको प्रमुख आतिथ्यतामा औपचारिक कार्यक्रम सम्पन्न भएको थियो ।



प्रतिक्रिया दिनुहोस्