नेपालगञ्ज : काठमाण्डौमा उपचारको क्रममा दिवंगत भएका नेपालगञ्ज उपमहानगरपालिका वडा नम्बर ९ का वडा अध्यक्ष विष्णु बहादुर लामाको अन्तिम संस्कारका लागि शव नेपालगञ्ज ल्याईदै छ ।
५२ बर्षीय वडा अध्यक्ष लामाको उपचारकै क्रममा काठमाडौंको मेडिसिटी अस्पतालमा बिहीबार साँझ निधन भएको परिवारले जनाएको छ । तत्कालिन नेकपा एमालेबाट निर्बाचित मृतक लामा जन्डिस, कलेजो सम्बन्धी समस्याले ग्रसित थिए ।
उनी १ महिनादेखि नियमित उपचारमा समेत रहेकै बेलामा दिवंगत भएको नेपालगञ्ज उपमहानगरपालिकाका प्रवक्ता तथा वडानं. १ का वडा अध्यक्ष प्रमोद रिजालले जानकारी दिए ।
उनले मतक लामाको शव लिएर परिवारजन काठमाण्डौबाट नेपालगञ्जको लागि प्रस्तान गरिसकेको र शुक्रबार दिउसोसम्म नेपालगञ्ज आईपुग्ने बताए । वडा अध्यक्ष लामाको मृत्युपछि शोक मनाउन नेपालगञ्ज उपमहानगरका सबै वडा कार्यालय बन्द गरिएको छ ।
