सदरलाइनडटकम,
नरैनापुर (बाँके) : भारतीय टेलिफोन कम्पनीको मोबाइल फोनमा भर पर्दै आएका नरैनापुर गाउँपालिकाका स्थानीयले नेपाली मोबाइल फोन प्रयोग गर्न थालेका छन् ।
यहाँ नेपाली टेलिफोन सेवा प्रदायक कम्पनीले सञ्चालन गरेको मोबाइल फोन प्रयोग गर्नेको संख्या बढ्दै गएको छ । नेपाली मोबाइल कम्पनीले सञ्चालन गरेको मोबाइल सेवा नेटवर्कले राम्रोसँग काम गर्न थालेपछि प्रयोगकर्ताको संख्या बढेको हो ।
नेपाल टेलिकमले चौबिसै घण्टा मोबाइल नेटवर्कको व्यवस्था गरेपछि पछिल्लो समय नेपाली मोबाइल फोनको प्रयोगकर्ता बढेको नरैनापुर गाउँपालिका–५, मटेहियाका मोहम्मद सफिक बेहनाले बताए ।
बघौडा भनेर चिनिने नरैनापुर गाउँपालिका विकासको हिसाबले बाँकेको कर्णाली भनेर चिनिन्छ । भारतीय टेलिफोनमा निर्भर रहेको नरैनापुर गाउँपालिकाको कार्यालयका साथै छ वटै वडामा इन्टरनेट सेवा पुगेको छ ।
गाउँपालिकाका प्रमुख प्रशासकीय अधिकृत दलबहादुर बस्नेतले कामकाजमा सहजता ल्याउन सबै वडा कार्यालयमा इन्टरनेटको ब्यवस्था गरिएको बताए । उनले इन्टरनेट प्रयोग गर्न नेपालगञ्ज जानुपर्ने बाध्यता अन्त्य भएको बताए । इन्टरनेट बिस्तारसँगै गाउँपालिकाले इ–बिडिङमार्फत टेण्डर हाल्ने व्यवस्था मिलाएको छ ।
नेपाली मोबाइल फोन प्रयोग गर्दै नरैनापुरबासी
२८ माघ २०७५, सोमबार १०:५९
