Sadarline
२०८३ मंसिर ६ , शनिबार

स्वस्तिका र टेकेन्द्रलाई तेस्रो राप्तीसोनारी नेचर रनको उपाधि



राप्तीसोनारी (बाँके) : बाँकेको राप्तीसोनारीस्थित मदुवामा भएको तेस्रो राप्तीसोनारी नेचर रनको उपाधि स्वस्तिका शाही र टेकेन्द्र डांगीले शनिवार जितेका छन् ।

शनिबार सम्पन्न भएको सो दौडमा १० किलोमिटर खुला महिलातर्फ स्वस्किाले प्रथम स्थान हासिल गर्दा रीता कुसारी दोस्रो र नन्दिता थारु तेस्रो भए । त्यसैगरी खुला पुरुषतर्फ टेकेन्द्रसँगै निराजन चौधरीले दोस्रो र प्रशान्त तामाङले तेस्रो स्थान हासिल गरे ।

राप्तीसोनारी पालिका अन्तर्गतका स्कुल स्तरीय छात्रतर्फ भबिन्द्र बोहरा, समिर थारु र बिशाल यादवले क्रमशः शीर्ष तीन स्थान हासिल गर्दा छात्रातर्फ ३ किलोमिटरमा रेणुका चौधरी, अनुजा थारु र निस्मा थारु क्रमशः पहिलो, दोस्रो र तेस्रो भए ।

तीन सय बढी धावकको सहभागिता रहेको दौडमा सबै विधाका शीर्ष तीनजनालाई नगद तीन हजार, दुई हजार र एक हजार सहित पदकले पुरस्कृत गरियो ।

जर्मनीमा बसोबास गर्दै आएका मदुवानिवासी पुर्व राष्ट्रिय खेलाडी तीर्थ ओलीको पहलमा नेपालगञ्ज म्याराथनको भगिनी दौड कार्यक्रमका रुपमा राप्तीसोनारी नेचर रन हरेक वर्ष हुँदै आएको छ । यसका शीर्ष दश जनालाई मंसिर १२ गते हुने नेपालगञ्ज म्याराथनको १२औं संस्करणमा स्वतः सहभागिता दिइने रेस डाइरेक्टर चन्द्र गुरुङले जानकारी दिए ।

एक किलोमिटर वाकाथनमा राप्तीसोनारीका अध्यक्ष तप्त पौडेल, उपाध्यक्ष मनिषा थारु, लुम्बिनी प्रदेश सभाका पुर्वसदस्य कृष्णा केसी नमुना लगायत झण्डै सय जनाले भाग लिएका थिए । पालिका अध्यक्ष पौडलले दौडको उदघाटन गर्दै तेस्रो संस्करणदेखि सिंगो पालिका र वडा नं २ ले समेत अपनत्व लिएको जानकारी गराउँदै यसको निरन्तरताको आधार तयार भएको बताए ।

लुम्बिनी प्रदेशसभा पुर्व सदस्य कृष्णा केसी, वडाध्यक्ष ज्ञानेन्द्र ओली, नेपालगञ्ज म्याराथनका संस्थापक टीएस ठकुरी लगायतले विजयी खेलाडीलाई पुरस्कृत गरेका थिए ।

प्रकाशित मिति : २०८३ मंसिर ६ गते शनिबार
ताजा समाचार