सुर्खेत : नेपाल आयल निगमले कर्णाली प्रदेशको सुर्खेतमा इन्धन भण्डारण गृह निर्माण गर्ने भएको छ । कर्णाली प्रदेशमा इन्धनको आपूर्ति व्यवस्था सहज बनाउन भण्डारण गृह निर्माण गर्न लागिएको हो ।
सुर्खेतमा डिजेल, पेट्रोलको भण्डारण गृह नभएकाले कर्णाली प्रदेशलाई लक्षित गरी भण्डारण गृह निर्माण गर्न लागिएको हो । निगमका प्रवक्ता मनोजकुमार ठाकुरले दुई ठाउँमा भण्डारण गृह निर्माणका लागि सरकारी जग्गा खोजिरहेको जानकारी दिए ।
उनले भने, “इन्धनको आपूर्ति व्यवस्था सहज बनाउनका लागि भण्डारण गृह निर्माण गर्न लागेका छौँ, जग्गा प्राप्त हुनासाथ भण्डारण गृह निर्माण प्रक्रिया अगाडि बढाउँछौँ ।
सुर्खेतमा डिजेल, पेट्रोलको भण्डारण गृह नहुँदा नेपालगञ्जबाट टयाङ्करमा लगेर व्यवस्थापन भइरहेको छ, इन्धनको माग बढ्दै गएकाले कर्णाली प्रदेशभरि आपूर्ति व्यवस्था सहज बनाउन भण्डारण गृह बनाइने छ ।” जग्गा प्राप्ति भएपछि दोस्रो चरणमा भण्डारण गृह निर्माण कार्य अगाडि बढाइने निगमले जनाएको छ ।
