समाचार सारांश
- कैलालीमा सैन्य अभ्यासका क्रममा ग्रिनेडको छर्रा लागेर नेपाली सेनाका हुड्डा हिमालविक्रम विष्ट गम्भीर घाइते भएका थिए।
- उपचारका लागि लम्कीस्थित अस्पताल लगिए पनि उनको मृत्यु भएको प्रहरीले जनाएको छ।
- घटनामा सह–सेनानी हिमराज जोशी पनि घाइते भएका छन् र थप उपचारका लागि हेलिकोप्टरमार्फत काठमाडौं पठाइएको छ।
धनगढी : कैलालीमा नेपाली सेनाको सैन्य अभ्यास अन्तर्गत फायरिङ अभ्यासका क्रममा ग्रिनेडको छर्रा लागेर एक सैनिकको मृत्यु भएको छ भने अर्का एक सैनिक घाइते भएका छन् ।
जिल्ला प्रहरी कार्यालय कैलालीका अनुसार लम्कीचुहा नगरपालिका–३, गोराङ्गेमा रहेको सुदूरपश्चिम पृतना तालिम शिक्षालय गोराङ्गे ब्यारेकका हुड्डा हिमालविक्रम विष्टको ज्यान गएको हो ।
लम्कीस्थित लालरत्न अस्पतालमा उपचारको क्रममा विष्टको ज्यान गएको जिल्ला प्रहरी कार्यालयका प्रवक्ता प्रहरी नायब उपरीक्षक योगेन्द्र तिमिल्सिनाले जानकारी दिए ।
मोहन्याल गाउँपालिका–७ मा रहेको जालपा सामुदायिक वनमा आज विहान ९ः४५ बजे फायरिङ अभ्यासको क्रममा ग्रिनेडको छर्रा लागेर विष्ट घाइते भएका थिए । उनको दाहिने हातको हत्केला र शरीरको अन्य भागमा छर्रा लागेको थियो ।
यसैगरी, नजिकै रहेका सह–सेनानी हिमराज जोशी पनि छर्रा लागेर घाइते भएका थिए । उनको अवस्था सामान्य रहेको जनाइएको छ । जोशीलाई थप उपचारको लागि नेपाली सेनाको हेलिकोप्टरमार्फत काठमाडौं लगिएको प्रहरी नायव उपरिक्षक तिमिल्सिनाले जानकारी दिए ।
