समाचार सारांश
- काठमाडौंको नागार्जुन–८ भीमढुंगाबाट प्रहरीले हुण्डी तथा अभौतिक मुद्रा कारोबारमा संलग्न दुई जनालाई पक्राउ गरेको छ।
- २८ वर्षीय सागर गिरी र प्रमोदप्रसाद धिताललाई १ करोड १६ लाख रुपैयाँ नगदसहित पक्राउ गरिएको प्रहरीले जनाएको छ।
- उनीहरूको साथबाट चेकबुक, एटिएम कार्ड, सिमकार्ड, मोबाइल, सवारीसाधन लगायतका सामग्री बरामद गरी पाँच दिन म्याद थप गरेर अनुसन्धान भइरहेको छ।
नेपालगञ्ज : प्रहरीले हुन्डी तथा अभौतिक मुद्रा कारोबार गर्ने २ जनालाई १ करोड १६ लाख रुपैयाँ नगद सहित काठमाडौंको भिमढुंङ्गाबाट पक्राउ गरेको छ ।
जिल्ला प्रहरी परिसर काठमाडौँको टोलीले काठमाडौँको नागार्जुन नगरपालिका–८ भीमढुङ्गाबाट हुण्डीको रकमसहित नागार्जुन नगरपालिका–८ भीमढुङ्गाका २८ वर्षीय सागर गिरी र सोही स्थानका २८ वर्षीय प्रमोदप्रसाद धिताललाई पक्राउ गरी सार्वजनिक गरेको हो ।
परिसरका प्रवक्ता, प्रहरी उपरीक्षक पवनकुमार भट्टराईले अभौतिक मुद्राको कारोबार गरिरहेको सूचनाको आधारमा उनीहरुलाई पक्राउ गरिएको जानकारी दिए ।
पक्राउ परेका ब्यक्तिका साथबाट तीन थान चेकबुक, विभिन्न व्यक्तिको नाममा काटेको २७ लाख ३० हजार चेक, विभिन्न बैंकका एटिएम चार थान, नागरिकता एक थान, चारपाङ्ग्रे सवारीसाधन दुई थान, दुईपाङ्ग्रे सवारीसाधन एक थान, सवारी दर्ता किताब तीन थान बरामद गरिएको उनले जानकारी दिए ।
यसैगरी, विभिन्न कम्पनीका मोबाइल छ थान, एनसेल, एनटिसीको सिम ३१ थान, कम्प्युटर एक थान बरामद गरिएको छ । पक्राउ परेका दुवै जनालाई जिल्ला अदालत काठमाडौँबाट पाँच दिनको म्याद थप गरी अनुसन्धान भइरहेको प्रवक्ता भट्टराईले जानकारी दिए ।
