नेपालगञ्ज : बाँके जिल्लामा सञ्चालित आयुर्वेद स्वास्थ्य केन्द्र तथा नागरिक आरोग्य सेवा केन्द्रप्रति स्थानीयको आकर्षण दिनानु दिन बढ्दै गएको छ ।
आयुर्वेद औषधीको कुनै पनि साइड इफेक्ट नभएको र सो उपचार पद्धतिबाट रोगलाई जरैबाट समाप्त गर्न सकिने हुँदा बिरामीको आकर्षण बढ्दै गएको आयुर्वेद स्वास्थ्य केन्द्र तथा नागरिक आरोग्य सेवा केन्द्र बाँकेका सूचना अधिकारी सिताराम चौधरीले बताए ।
उनले चालु आर्थिक वर्षको पुस मसान्तसम्म ६ महिनाको अवधिमा मात्र आयुर्वेद केन्द्रबाट १९ हजार २३८ जनाले उपचार सेवा लिएको जनाउँदै यस वर्ष गत वर्षभन्दा बढीले सेवा लिने अनुमान गरिएको बताए ।
आयुर्वेद स्वास्थ्य केन्द्र तथा नागरिक आरोग्य सेवा केन्द्रका अनुसार, साउनमा ३ हजार १७६, भदौमा ३ हजार २१, असोजमा ३ हजार ६३१, कात्तिकमा २ हजार ६००, मङ्सिरमा ३ हजार १०१ र पुसमा ३ हजार ७०९ ले उपचार सेवा लिएका छन् ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
सो केन्द्रमा आएर उपचार सेवा लिने सबैभन्दा बढी १७ देखि ५९ वर्ष उमेर समूहका बिरामीहरू रहेका थिए । उक्त उमेर समूहका १३ हजार बढीले त्यहाँ पुगेर ६ महिनामा उपचार सेवा लिएको केन्द्रका सूचना अधिकारी चौधरीले बताए । उनले गत आर्थिक वर्ष २०७९/०८० मा सो केन्द्रबाट ४१ हजार ३४ जनाले आयुर्वेद उपचार सेवा लिएको पनि बताए ।
बाँकेका आयुर्वेद स्वास्थ्य केन्द्रमा बाँके, बर्दिया, सल्यान, रुकुम, जाजरकोट, मुगु लगायतका जिल्लाबाट समेत बिरामी उपचारका लागि आउने गरेको जनाइएको छ । बाँकेमा सञ्चालित आयुर्वेद स्वास्थ्य केन्द्रहरूबाट उपचार सेवा लिनेहरू बढ्दै जाँदा ती केन्द्रमा पुगेर विभिन्न खालको थेरापी सेवा लिनेहरूको सङ्ख्या पनि बढिरहेको केन्द्रले जनाएको छ ।
चालु आर्थिक वर्षको ६ महिनामा थेरापी सेवा मानिने पूर्व पञ्चकर्म सेवा २ हजार ९१० बिरामीले लिएको केन्द्रको तथ्याङ्कमा उल्लेख छ । त्यस्तै ज्येष्ठ नागरिक तर्फ ९२७ ले सेवा लिएका थिए । योग सेवा लिनेको सङ्ख्या दुई हजार २८७ रहेको छ भने स्तनपायी सेवा ६३५ जना आमाले प्राप्त गरेको आयुर्वेद स्वास्थ्य केन्द्रले जनाएको छ ।