नेपालगञ्ज : आइतवार म्याजिक दुर्घटनामा परी घाइते भएको कोहलपुर ३ मदनचोक बस्ने ८१ वर्षीया बृद्धा कौशिल्या शाहीको उपचारका क्रममा सोमवार विहान मृत्यु भएको छ । उनको नेपालगञ्ज नर्सिङहोममा मृत्यु भएको हो ।
बर्दियाको बाँसगढीबाट नेपालगञ्ज आउँदै गरेको भे १ ज १२०७ नम्बरको म्याजिक भ्यान कोहलपुर ४ किरणखोला नजिकै दुर्घटनामा परेको थियो । तीब्र गतिमा रहेको म्याजिक सडकबाट खेतको खाल्टोमा खस्दा भ्यानमा सवार ८ जना घाइते भएका थिए ।
घाइतेहरुलाई उपचारका लागि नेपालगञ्ज मेडिकल कलेज शिक्षण अस्पताल पठाइए पनि शाहीलाई थप उपचारका लागि नेपालगञ्ज नर्सिङ लगिएको थियो । अन्यको अवस्था सामान्य रहेको र उपचार भइरहेको प्रहरीले जनाएको छ । चालकलाई प्रहरीले नियन्त्रणमा लिएको छ ।
