समाचार सारांश
- सशस्त्र प्रहरी महानिरीक्षक नारायणदत्त पौडेलले बाँकेको सीमा क्षेत्र, नौबस्ता कारागार, जमुनाहा नाका, आईसीपी र बागेश्वरी पोष्टको स्थलगत निरीक्षण गरेका छन्।
- निरीक्षणका क्रममा सीमा सुरक्षा, तस्करी, अवैध ओसारपसार, लागुऔषध कारोबार तथा अन्य सीमा अपराध नियन्त्रणबारे सुरक्षा अधिकारीबाट जानकारी लिएका छन्।
- दशगजा क्षेत्रमा भारतीय एसएसबीका अधिकारीसँग भेट गर्दै सीमा सुरक्षा र द्विपक्षीय समन्वयलाई थप प्रभावकारी बनाउने विषयमा छलफल भएको छ।
नेपालगञ्ज : सशस्त्र प्रहरी बल नेपालका प्रमुख सशस्त्र प्रहरी महानिरीक्षक नारायणदत्त पौडेलले सोमबार बाँकेको समग्र सुरक्षा अवस्था र सीमा क्षेत्रको वस्तुस्थितिको स्थालगत अवलोकन गरेका छन् ।
उनले जिल्लाका विभिन्न सीमा नाका, कारागार तथा सुरक्षा इकाईहरूको स्थलगत अवलोकन गरेका हुन । आफ्नो भ्रमणका क्रममा सशस्त्र प्रहरीका आईजी पौडेलले नौबस्ता कारागार, नेपाल–भारत सीमास्थित मुख्य नाका जमुनाह र एकीकृत जाँच चौकी (आईसीपी) को निरीक्षण गरेका थिए ।
यसका साथै, उनी सशस्त्र प्रहरी बल नेपाल ३० नम्बर गण बागेश्वरी पोष्टको पनि अवलोकन गर्दै त्यहाँको समग्र सुरक्षा प्रबन्ध र जनशक्तिको अवस्थाबारे जानकारी लिएका थिए ।
अनुगमनका क्रममा नेपाल–भारत सीमा क्षेत्रको दशगजा क्षेत्रमा पुग्नुभएका महानिरीक्षक पौडेललाई भारतीय सशस्त्र सीमा सुरक्षा बल ४२ औं वाहिनीका प्रमुख गिरीश चन्द्र पाण्डेले स्वागत गरेका थिए । दुई देशका सीमा सुरक्षा निकायका उच्च अधिकारीबीच भएको भेटलाई सीमा सुरक्षा र द्विपक्षीय समन्वयका दृष्टिले महत्वपूर्ण मानिएको छ ।
जमुनाहा नाका हुँदै दैनिक ठूलो संख्यामा नेपाली तथा भारतीय नागरिकको आवतजावत हुने गरेको छ । पछिल्लो समय यस क्षेत्रमा अवैध ओसारपसार, तस्करी, लागुऔषध कारोबार तथा अन्य सीमा अपराध नियन्त्रण सुरक्षा निकायका लागि चुनौती बन्दै आएका छन् ।
अवलोकन तथा निरीक्षणका क्रममा सशस्त्र प्रहरी बल ३० नम्बर गण, बागेश्वरीका प्रमुख तथा सशस्त्र प्रहरी उपरीक्षक भीमबहादुर चन्दले महानिरीक्षक पौडेललाई जिल्लाको वर्तमान सीमा सुरक्षा व्यवस्थाका बारेमा विस्तृत ब्रिफिङ गरेका थिए ।
गणपति एसपी चन्दले सीमा नाकामा हुने चोरी–निकासी तथा अवैध गतिविधि नियन्त्रण, सीमा सुरक्षाको वर्तमान अवस्था र शान्ति सुव्यवस्था कायम गर्न सुरक्षाकर्मीहरूले गरिरहेको कार्यसम्पादनको बारेमा जानकारी गराएका थिए ।
आईजि पौडेलका साथमा डिआईजी दीपक अधिकारीलगायतका उच्चस्तरिउ अधिकारीहरु संलग्न छन । यस किसिमको उच्चस्तरीय निरीक्षण तथा अनुगमनले सीमा क्षेत्रमा अहोरात्र खटिएका सशस्त्र प्रहरी कर्मचारीहरूको मनोबल उच्च बनाउनुका साथै आगामी दिनमा सीमा सुरक्षा व्यवस्थापनलाई थप चुस्त र प्रभावकारी बनाउन मद्दत पुग्ने अपेक्षा गरिएको छ ।
