समाचार सारांश
- रमजान पर्व बाँकेमा बिहीबारदेखि सुरु भएको छ, जामा मस्जिद नेपालगञ्जबाट चन्द्रमा देखिएको घोषणा गरिएको हो।
- यस पवित्र महिनामा मुस्लिम समुदायले एक महिनासम्म रोजा, नमाज र धार्मिक कार्य गर्छन्।
- रमजानमा दान, सहिष्णुता र सामाजिक सद्भाव प्रवर्द्धन गर्ने परम्परा पनि रहेको छ।
नेपालगञ्ज : ईस्लामिक पात्रो अनुसार रमजान महिना हिजोदेखि सुरु भएको छ । ईस्लाम धर्म अनुसार रमजानमा एक महिनासम्म उपवास बसेर विविध कार्यक्रमका साथ मनाइने मुस्लिम समुदायको महान पर्व रमजान बिहीबारबाट बाँकेमा पनि सुरु भएको हो ।
बुधबार मध्यरातमा नेपालगञ्जको जामा मस्जिदबाट मुख्य धर्मगुरु मौलाना मुफ्ती जाफर रजाले रमजानको चन्द्रमा देखिएको घोषणा गरेसँगै बिहीबारबाट रमजानको महिना सुरु भएको हो ।
मुफ्ती रजाले रमजानको चन्द्रमा देखिएकोले बाहीबारबाट एक महिनासम्म रोजा बसेर विविध धार्मिक तथा सामाजिक कार्य गर्न मुस्लिम सुमदायलाई आग्रह गरे ।
एक महिनासम्म मनाइने रमजान इस्लाम धर्मावलम्बीहरूको महत्त्वपूर्ण पवित्र महिना हो । बुधबारबाटै तरावी नमाज बाँकेका सबै मस्जिदहरूमा सुरु गरिएको जामामस्जिद सञ्चालक समितिले जनाएको छ ।
रमजान सुरु भएको अवसरमा दारुल उलुम बरकातियाका संस्थापक तथा धर्मगुरु मौलाना अब्दुल जब्बार मन्जरीले इस्लाम धर्मावलम्बीहरूको रमजान पर्वको अवसरमा शुभकामना व्यक्त गर्दै आपसी सहिष्णुता, आत्मियता, धार्मिक तथा सांस्कृतिक सद्भाव र भातृत्वलाई प्रवर्धन गर्न आग्रह गरे ।
धर्मगुरु मन्जरीका अनुसार मुस्लिम समुदायको पाँच अनिवार्य धार्मिक कार्यहरूमा कलमा, रोजा, नमाज, हज, र जकात हुन् । ती मध्ये रोजा पनि भएकोले यसलाई अत्याधिक महत्त्वका साथ मनाइने गरिएको छ ।
उनका अनुसार घाम उदाउनुभन्दा डेढ घण्टा अगावै सेहरी (खानेकुरा) खाएर प्रारम्भ गरिने रोजा घाम अस्ताएपछि फलफूल तथा मिठाइ खाएर समाप्त गरिन्छ । यो समयलाई रोजा खोल्ने समय भनिन्छ ।
दिनभर पानी लगायत केही पनि खान नहुने यो पर्वमा मुस्लिमले आ–आफ्नो गच्छे अनुसार विभिन्न किसिमका परिकार बनाई रोजा खोल्ने गर्छन् । यो महिनामानै मुस्लिम समुदायले सबैभन्दा बढी दान गर्ने गर्छन् भने रोजा खोल्ने सामुहिक कार्यक्रमहरू पनि ठाउँ ठाउँमा महिनाभरिनै राख्ने गरिन्छ ।
