काठमाडौँ : नेपाली काँग्रेसका सभापति शेरबहादुर देउवा र उनकी पत्नी आरजु राणा उपचारका लागि गए राति सिंगापुर प्रस्थान गरेका छन् । उनीहरु गत भदौ २३ र २४ गतेको जेनजी आन्दोलनका बेलामा घाइते भएका थिए ।
देउवा दम्पती उपचारको लागि गए राति ११ बजेको उडानबाट सिंगापुर प्रस्थान गरेका हुन । गत भदौ २४ गते जेन–जी आन्दोलन क्रममा आफ्नै निवास बुढानीलकण्ठमा सभापति देउवा र तत्कालीन परराष्ट्र मन्त्री आरजुमाथि भौतिक आक्रमण भएको थियो ।
उनीहरूको घरमा समेत आगजनी र तोडफोड गरिएको थियो । सो आक्रमणका कारण सभापति देउवाको गर्धन र टाउकोमा चोट लागेको थियो भने तत्कालीन परराष्ट्र मन्त्री राणालाई प्रदर्शनकारीहरूले लछारपछार गरेका थिए ।
त्यस दिन नेपाली सेनाले उद्दार गरेर सभापति देउवा दम्पतीको उपचार गरेको थियो ।
असोज २८ गते सानेपास्थित केन्द्रीय कार्यालयमा उपस्थित भएर केन्द्रीय समिति बैठकमा धारणा राख्दै सभापति देउवाले उपसभापति पूर्णबहादुर खड्कालाई कार्यवाहक सभापतिको जिम्मेवारी तोक्दै घरमै आराम गर्दै आएका थिए ।
