नवलपुर : पूर्वपश्चिम राजमार्गको नारायणघाट–बुटवल खण्डको विनयी त्रिवेणी गाउँपालिका–१ विनयी खोलामा आएको बाढीले काठमाडौँबाट नेपालगञ्जतर्फ जाँदै गरेको भे १ ख ४०८५ नम्बरको यात्रुवाहक बस बगाएको छ ।
बसमा तीन शिशुसहित ३८ जना यात्रु रहेका थिए । ‘रुद्राक्ष’ नामको सो बस बिहिबार साँझ काठमाण्डौबाट नेपालगञ्नका लागि छुटेको थियो । उक्त क्षेत्रमा पानी निरन्तर परिरहेका कारण खोलाबाट बस निकाल्न नसकिएको उनले भनाई छ । यात्रुको सामान के कति बगायो भन्नेबारे थाहा हुन सकेको छैन ।
बिनयी खोलाको नयाँ डाईभर्सन पार गर्दै गर्दा बसलाई गए राति बाढीले बगाएको इलाका प्रहरी कार्यालय दुम्कीबासका प्रमुख प्रहरी निरीक्षक राजन तिमिल्सेनाले जानकारी दिए । विनयी खोलाको नयाँ डाइभर्सनबाट बस गुडिरहेको बेला एक्कासी आएको बाढीले बस बगाएको उनले बताए ।
प्रहरी निरीक्षक तिमिल्सेनाले भने–‘नयाँ डाइभर्सनबाट आउँदै गर्दा बाढीले बस बगाएको हो । तत्काल एक्साभेटर लगेर सबै यात्रुको सकुशल उद्धार गर्न सफल भयौँ ।’
रातभरी परेको पानीका कारण उक्त सडकखण्ड पूर्णरुपमा अवरुद्ध छ । दाउन्नेमा सडक हिलाम्य भएकाले सवारीसाधन गुड्न सकेका छैनन । वैकल्पिक सडक प्रयोग गर्न प्रहरी निरीक्षक तिमिल्सेनाले यात्रुलाई आग्रह गरेका छन् ।
