बर्दिया : बर्दियामा दोहोरो नेपाली नागरिकता लिएका ६ जनामाथि कारबाही गरी नागरिकता खारेज गरिएको छ ।
एक वर्षयता दोहोरो नागरिकता लिएका उनीहरूको नागरिकता खारेज गर्नुका साथै १ देखि ५ हजार रुपैयाँ जरिवाना लिएको जिल्ला प्रशासन कार्यालय बर्दियाका प्रमुख जिल्ला अधिकारी बन्धुप्रसाद बास्तोलाले बताए । गत आर्थिक वर्षमा परेका १२ वटा उजुरीमध्ये ६ वटाको फस्यौंट भएको हो ।
कञ्चनपुर जिल्लाको दोधारा चाँदनीकी रूपा तिरुवा, गेरुवा गाउँपालिकाका पंकजसिंह राठौर, बढैयाताल–६ का लल्लुराम थारुको नागरिकता खारेज भएको छ । उहाँहरुबाट जरिवाना समेत असुल भएको जिल्ला प्रशासन कार्यालय बर्दियाको मुद्दा फाँटका प्रमुख विनय केसीले बताए ।
यस्तै मधुवन–५ का कृष्ण गुरुङ र राजापुर–३ का कृष्ण थारुको पनि दोहोरो नागरिकता खारेज गर्दै १ हजार रुपैयाँ जरिवाना गरिएको छ । गुलरिया–६ का इमरान राइनको दोहोरो नागरिकता खारेज गर्दै ५ हजार रुपैयाँ जरिवाना गरेको मुद्दा फाँट प्रमुख केसीले बताए ।
