नेपालगञ्ज : कोरोना संक्रमणबाट बाँकेमा थप दुई जनाको मृत्यु भएको छ । बर्दियाका ७२ वर्षीय पुरुष र कञ्चनपुरका ७३ वर्षीय पुरुषको आइतवार राती उपचारका क्रममा मृत्यु भएको हो ।
बर्दियाको गेरुवा गाउँपालिका वडा नं. ५ का ७२ वर्षीय पुरुषको भेरी अस्पताल नेपालगञ्जमा उपचारका क्रममा आइतवार राती १ बजेर ११ मिनटमा मृत्यु भएको जिल्लाका कोभिड–१९ संकट व्यवस्थापन केन्द्र बाँकेका सूचना स्रोत व्यक्ति तेज वलीले बताए । पिसिआर परीक्षणका क्रममा उनलाई मंसिर १४ गते कोरोना संक्रमण पुष्टि भएको थियो ।
त्यस्तै कञ्चुरको शुक्लाफाँटा ४ का ७३ वर्षीय पुरुषको नेपालगञ्ज मेडिकल कलेज शिक्षण अस्पताल कोहलपुरमा उपचारका क्रममा आइतवार राती पौने २ बजे मृत्यु भएको छ ।
सेती अस्पतालमा स्वाब परीक्षणका क्रममा उनलाई मंसिर १३ गते संक्रमण पुष्टि भएको बताइएको छ । उनको स्वास्थ्यमा समस्या उत्पन्न भएपछि मंसिर १५ गते कोहलपुरमा भर्ना गरिएको थियो ।
योसँगै बाहिर जिल्लाबाट बाँकेमा उपचारका लागि आएका ६४ जनाको कोरोनाका कारण मृत्यु भइसकेको छ ।
