नेपालगञ्ज : बर्दियाको गुलरियाबाट लागुऔषध ब्राउन सुगरसहित सोमवार एकजना पक्राउ परेका छन् । गुलरिया नगरपालिका–२ खैरापुरका ३५ वर्षीय अकलेस यादवलाई पक्राउ गरिएको प्रहरीले जनाएको छ ।
विशेष सूचनाको आधारमा नेपालगञ्जबाट गएको लागुऔषध ब्यूरोका प्रहरी नायब निरीक्षक प्रेम बहादुर अधिकारी र बर्दिया प्रहरीको संयुक्त टोलीले गुलरिया सहिद पार्क नजिकैबाट बा ८५ प ९८२८ नम्वरको मोटरसाइकलसहित यादवलाई पक्राउ गरेको छ ।
शंकास्पद देखिएपछि चेकजाँच गर्दा यादवको हाफ पाइन्टको दाहिने गोजीमा २७ ग्राम ५०० मिलिग्राम ब्राउन सुगर फेला परेको प्रहरीले जनाएको छ ।
उनलाई जिल्ला प्रहरी कार्यालयको हिरासतमा राखेर थप अनुसन्धान शुरु गरिएको प्रहरीले जनाएको छ ।
