नेपालगञ्ज : प्रतिबन्धित लागुऔषध ब्राउन सुगरसहित बाँकेमा दुईजना पक्राउ परेका छन् । नेपालगञ्ज १८ का प्रदिप खटिक र नेपालगञ्ज १६ जयसपुरकी २१ वर्षीया निशा खान लागुऔषध ब्राउन सुगरसहित पक्राउ परेका हुन् ।
खटिकलाई नेपालगञ्ज उपमहानगरपालिका वडा नम्बर १४ उदयपुरबाट ४ ग्राम लागुऔषध ब्राउन सुगर र जयसपुरका बिलेदार खानकी २१ बर्षीया छोरी निशालाई भारतबाट नेपाल ल्याउँदै गरेको अवस्थामा १४ ग्राम ब्राउन सुगरसहित नियन्त्रणमा लिइएको प्रहरीले जनाएको छ ।
सादा पोशाकमा रहेका जिल्ला प्रहरी कार्यालय बाँकेका प्रहरी नायव निरीक्षक बमबहादुर रावलको नेतृत्वमा खटिएको टोली र लागुऔषध नियन्त्रण व्यूरोका प्रहरी नायब निरीक्षक प्रेमबहादुर अधिकारीसहितको संयुक्त प्रहरी टोलीले खटिकलाई पक्राउ गरेको प्रदेश प्रहरीले जनाएको छ ।
यस्तै सिमा प्रहरी चौकी जयसपुरका प्रहरी नायव निरीक्षक मिनबहादुर बिष्ट नेतृत्वको टोलीले नेपालगञ्ज उपमहानगरपालिका वडा नम्बर १६ वडा कार्यालय चोकबाट निशालाई पक्राउ गरेको हो ।
पक्राउ परेका दुबैजनामाथि थप अनुसन्धान भईरहेको प्रदेश प्रहरी कार्यालयले जनाएको छ ।
