बिराटनगर : कोशी प्रदेशका प्रदेश प्रमुख परशुराम खापुङले कोशी प्रदेश सभाबाट पारित भई आएका पाँच विधेयक प्रमाणीकरण गरेका छन् ।
उनले नेपालको संविधानको धारा २०१ को उपधारा (१) बमोजिम सभामुखबाट प्रमाणित भई पेश हुन आएका विधेयकहरू प्रमाणित गरेको उनको सचिवालयले जनाएको छ ।
प्रमाणीकरण गरिएका विधेयकहरुमा प्रदेश जीवनाशक बिषादी व्यवस्थापन गर्न बनेको विधेयक २०८१ तथा प्रदेश बीउ बिजन सम्बन्धी व्यवस्था गर्न बनेको विधेयक २०८१ रहेका छन् ।
यसैगरी केही प्रदेश ऐनलाई संशोधन गर्न बनेको अध्यादेश, २०८१ लाई प्रतिस्थापन गर्न बनेको विधेयक तथा प्रदेश भवन ऐन, २०७६ लाई संशोधन गर्न बनेको विधेयक, २०८१ र कोशी प्रदेश वातावरण संरक्षण ऐन, २०७६ लाई संशोधन गर्न बनेको विधेयक, २०८१ पनि प्रदेश प्रमुख खापुङले प्रमाणित गरेको प्रवक्ता नारायणप्रसाद भट्टराईले जानकारी दिए ।
