नेपालगञ्ज : बाँके प्रहरीले पछिल्लो समयमा विभिन्न जनचेतनामूलक कार्यक्रम सञ्चालनमा ल्याएको छ । प्रहरीले नेपालगञ्जस्थित मङ्गलप्रसाद नमुना माध्यमिक विद्यालयका विद्यार्थीहरुलाई कानुनसम्बन्धी जनचेतनामूलक प्रशिक्षण प्रदान गरेको जनाएको छ ।
उक्त विद्यालयका कक्षा ९ र १२ का विद्यार्थीहरुलाई जबरजस्ती करणीसम्बन्धी कानुनी प्रक्रिया, हद म्याद र दण्ड सजायसम्बन्धी जनचेतनामूलक प्रशिक्षण प्रदान गरेको प्रहरीले जनाएको छ ।
जिल्ला प्रहरी कार्यालय बाँकेका प्रहरी निरीक्षक नरेश विकले जबरजस्ती करणीका बारेमा प्रशिक्षण दिएको प्रहरीले जनाएको छ । प्रशिक्षणमा जबरजस्ती करणी भनेको के हो ? यसको कानुनी प्रक्रिया, हदम्याद र दण्ड सजाय के हुन्छन् भन्ने बारेमा विद्यार्थीहरुलाई प्रहरी निरीक्षक विकले प्रशिक्षण दिनुभएको प्रहरीले जनाएको छ ।
जिल्ला प्रहरी कार्यालय बाँकेको आयोजना र सामुदायिक प्रहरी सेवा केन्द्रको समन्वयमा उक्त जनचेतनामूलक प्रशिक्षण दिइएको थियो ।
पछिल्लो समयमा प्रहरीले सामुदायिक प्रहरी सेवा केन्द्रसँगको समन्वयमा जिल्लाका विभिन्न विद्यालयहरुमा विभिन्न जनचेतनामूलक प्रशिक्षण कार्यक्रम सञ्चालन गर्दै आएको छ । विद्यार्थीमार्फत सचेतना प्रदान गर्दा समाजमा सकारात्मक प्रभाव पर्ने गरेका कारण विद्यार्थीहरुलाई विभिन्न सचेतनामूलक प्रशिक्षण प्रदान गर्ने गरेको प्रहरीले जनाएको छ ।
