सदरलाइनडटकम,
सल्यान : शारदा नगरपालिकाले छात्राहरुलाई निःशुल्क रुपमा सेनेटरी प्याड वितरण गरेको छ । महिनावारी भएको समयमा पनि विद्यालयमा छात्राहरु नियमित गराउन नगरपालिकाले सेनेटरी प्याड वितरण गरेको जनाएको छ ।
महिनावारी भएको बेला छात्राहरु लजाउने, विद्यालय आउन गाह्रो मान्ने गरेकाले नगरभित्रका सबै माध्यमिक विद्यालयहरुमा सेनेटरी प्याड वितरण गरिएको नगरप्रमुख सुरेश अधिकारीले बताए । महिनावारी भएको समयमा छात्राहरु विद्यालयमा आउँदैनन् भन्ने गुनासो आएपछि प्याड वितरण गरेको उनको भनाइ छ । शिवजन माविका ६०० छात्रासहित नगरभित्रका ३५ वटा विद्यालयका करिब एक हजार ८०० छात्रालाई निःशुल्क रुपमा सेनेटरी प्याड वितरण गरिएको छ ।
छात्राहरु विद्यालय आउँदा महिनावारी भए भागेर जाने, लजाउने, बीचैमा कक्षा छोडेर जाने समस्या खेप्दै आएकाले अब यो समस्या हट्ने विश्वास लिएको शिवजन माविका प्रधानाध्यापक हिरालाल नेपालीले बताए ।
विद्यालयमा सेनेटरी प्याडको व्यवस्था नहँुदा आफुहरुको पढाइ छुट्ने, कक्षामा रहेका बेला महिनावारी हुँदा एकदमै गाह्रो हुने, पढाइ छोडर घर जानु पर्ने हुने गरेकोमा अब भने यो समस्याबाट मुक्ति पाएको शिवजन माविको कक्षा १० की छात्रा सुनिता बिकले बताइन् । छात्राहरुका लागि सेनेटरी प्याड महत्वपूर्ण भएको छात्रा शुस्मा देवकोटा बताउँछिन् ।
यस वर्षदेखि सम्पूर्ण विद्यालयहरुमा सेनेटरी प्याड वितरण गर्ने नेपाल सरकारको योजना रहे पनि शारदा नगरपालिकाले आफ्नै बजेटबाट नगरभित्रका कक्षा ८ देखि १२ सम्म अध्ययन हुने विद्यालयहरुमा सेनेटरी प्याड वितरण गरेको शारदा नगरपालिकाका स्वास्थ्य शाखा प्रमुख वीरेन्द्र हमालले बताए ।
विद्यालयमा निःशुल्क सेनेटरी प्याड वितरण
१९ कार्तिक २०७६, मंगलवार १६:३०
