समाचार सारांश
- नेपालगञ्ज–४ का व्यवसायी तथा राजनीतिज्ञ मोहम्मद रहिस हल्वाई जसपा नेपाल छाडेर श्रम संस्कृति पार्टीमा आबद्ध भएका छन्।
- नेपाल जडिबुटी व्यवसायी संघका पूर्व महासचिव हल्वाईले ‘श्रमदाता सहयोगी सदस्य’का रूपमा सदस्यता लिएका हुन्।
- श्रम, उत्पादन र आत्मनिर्भरतालाई प्राथमिकता दिएको अभियानबाट समाज र देश निर्माणमा योगदान गर्ने उनले बताए।
नेपालगञ्ज : लामो समयदेखि व्यवसाय र राजनीतिमा सक्रिय नेपालगञ्ज–४ का मोहम्मद रहिस हल्वाई जनता समाजवादी पार्टी (जसपा) नेपाल छाडेर श्रम संस्कृति पार्टी तिर लागेका छन् ।
नेपाल जडिबुटी व्यवसायी संघका पूर्व महासचिव समेत रहेका हल्वाईले श्रम संस्कृति पार्टीको ‘श्रमदाता सहयोगी सदस्य’ का रूपमा सदस्यता लिएका हुन् । उनलाई पार्टीका संगठन प्रमुख राजन राना मगरले सदस्यता प्रदान गरेको जनाएका छन् ।
हल्वाईले श्रम, उत्पादन र आत्मनिर्भरतालाई प्राथमिकता दिएको अभियानमा आफू पनि जोडिन चाहेकाले श्रम संस्कृति पार्टीमा आबद्ध भएको बताए ।
‘राजनीतिलाई जनताको जीवनसँग जोड्नुपर्छ भन्ने मान्यताले मलाई श्रम संस्कृति पार्टीतर्फ आकर्षित गरेको हो,’ उनले भने, ‘अब श्रम र उत्पादनमार्फत समाज र देश निर्माण गर्ने अभियानमा सक्रिय भएर लाग्नेछु ।’
हर्कराज साम्पाङ राईको नेतृत्वमा रहेको श्रम संस्कृति पार्टीले श्रम र उत्पादनलाई राजनीतिको आधार बनाउँदै आएको छ । पार्टीले पछिल्लो समय संगठन विस्तार र सदस्यता अभियानलाई अघि बढाइरहेको जनाएको छ । ‘पार्टीको विचार र अभियानप्रति आकर्षित भएर विभिन्न क्षेत्रका व्यक्तिहरू जोडिने क्रम जारी छ,’ उनले भने, ‘बाँकेमा पनि संगठनलाई थप विस्तार गर्दै लैजानेछौं ।’
