समाचार सारांश
- बाँकेको खजुरा र बर्दियाको गुलरिया खण्डमा हुलाकी राजमार्गको स्तरोन्नति अन्तर्गत कालोपत्रे कार्य तीव्र रूपमा अघि बढेको छ, जसले वर्षौंदेखिको यात्रुको सास्ती अन्त्य गर्ने अपेक्षा गरिएको छ।
- २०७४ सालदेखि अलपत्र परेको सडकको ठेक्का खारेज भएपछि हुलाकी राजमार्ग निर्देशनालयले नयाँ ठेक्कामार्फत निर्माण कार्य अघि बढाएको हो।
- खजुरा बजारस्थित पेडारी नालाको नयाँ पुल निर्माण पनि अन्तिम चरणमा पुगेको छ, जसले हुलाकी राजमार्गको यात्रा अझ सहज र सुरक्षित बनाउनेछ।
खजुरा : कन्तबिजोग अवस्थामा छाडिएको हुलाकी राजमार्ग अन्तर्गतको बाँकेको खजुराखण्डको अबभने मुहार फेरिने भएको छ ।
हुलाकी सडक निर्देशनालयको नेपालगञ्ज योजना कार्यालयबाट खजुराखण्डको २ किलोमिटर र गुलरियाखण्डको २ दशमलव २३४ मिटर सडक स्तरउन्नतीका लागि ठेक्कापाएको निर्माण व्यवसायीले धमाधम कालोपत्रे गर्न सुरु गरेको छ ।
हुलाकी राजमार्ग निर्देशनालय योजना कार्यालय नेपालगञ्जबाट ठेक्का पाएको कुल १ हजार ८ सय मिटर सडकमा अहिले धमाधम अक्सफाल्ड प्रबिधिबाट कालोपत्रे भइरहेको योजना कार्यालयका साईड इन्जिनियर अनिल गिरीले बताए । सो सडक निर्माण व्यवसायी मैटहवा–एनएटी–स्टेटलाईट जेभीले ७ करोड १ हजार ६९ रुपैयाँमा ठेक्का पाएको थियो ।
फोरलेन सडक निर्माण गर्ने भन्दै २०७४ सालमा सडक डिभिजनबाट ठेक्का लगाइएकोमा ठेकेदार कम्पनीबाट गुणस्तरहिन र अधुरो काम गरेर बीचमै सडक अलपत्र पारेपछि हुलाकी सडकमा यात्रा गर्ने यात्रीहरुले विगत ९ वर्षदेखि सास्ती खेप्न बाध्य रहेका थिए ।
सडकको स्तरउन्नती अन्तर्गत कालोपत्रे गर्न थालिएसँगै सो सडकमा यात्रा गर्दा सास्ती खेपिरहेका यात्रुले राहत पाउने भएका छन् । सो सडकको २०७४ चैतमा गजुरमुखी कन्स्ट्रक्सन कम्पनी, इलामले निर्माण थालेको थियो । उक्त सडक २०७७ चैतमा निर्माण सम्पन्न गर्नुपर्ने थियो ।
ठेकेदारको कम्पनीको चरम लापरवाहीका बाबजुद सडक डिभिजनबाट पटक पटक म्याद थप्दा पनि योजना सम्पन्न नगर्ने र गरेका काम पनि गुणस्तरहिन भएपछि स्थानीयले पटक पटक आन्दोलन गर्दै आएका थिए । स्थानीयको लगातारको बिरोध र ठेकेदारको लापरवाही नसच्चिएपछि सडक डिभिजनले ठेक्का सम्झौता खारेज गरेको थियो ।
यसअघि सडक डिभिजनबाट काम भइरहेको सो सडक खण्डलाई हुलाकी राजमार्ग निर्देशनालयले जिम्मा लिएर स्तर उन्नती गर्न थालेको हो । खजुरा र गुलरिया खण्ड बाहेकको करिव २७ किलोमिटर सडक भने यसअघि नै हुलाकी सडक निर्देशनालयको योजनामा सम्पन्न भइसकेको छ । शर्मा एण्ड कम्पनीले ठेक्का लिएको १ वर्ष अगावै स्तरउन्नतीको काम सम्पन्न गरेको हो ।
सोही सडक खण्डको खजुरा बजार क्षेत्रमा पर्ने ७० वर्ष पुरानो पेडारी नालाको पुल निर्माणको काम पनि अन्तिम चरणमा पुगेको छ । ५ महिनामा सम्पन्न गर्ने लक्ष्य सहित ३४ मिटर लामो र २२ मिटर चौडाई रहेको पुल निर्माण कार्य केही दिनमा सम्पन्न हुने चरणमा पुगेको हुलाकी राजमार्ग योजना कार्यालय नेपालगञ्जका प्रमुख लिलाबहादुर भण्डारीले बताए ।
नयाँ निर्माण भएको पुल २२ मिटर चौडाइ र ३४.४ मिटर लम्बाइको छ । यसैगरी पुलको दुवैतर्फ २०० मिटर एप्रोच सडकको कालोपत्रे बाहेकको काम सम्पन्न भएको छ ।
हुलाकी राजमार्ग निर्माण भएसँगै नेपालगन्जबाट धनगढी, टिकापुर र महेन्द्रनगर यात्रा गर्ने यात्रुहरुले हुलाकी राजमार्ग प्रयोग गर्न थालेका छन् । साबिक पूर्वपश्चिम राजमार्ग प्रयोग गर्दा निकुञ्जको टाइम कार्ड, जनावरको असुरक्षा र लामो दूरी पर्ने भएको भन्दै यात्रुहरुको रोजाई हुलाकी राजमार्ग हुने गरेको छ ।
