समाचार सारांश
- लुम्बिनीका खेलकुद मन्त्री सन्तोष पाण्डे र सांसद अम्बिका काफ्लेले नेपालगञ्जको खेलकुद संरचनाको निरीक्षण गरे।
- पूर्वाधार सुधार, व्यवस्थापन र दीर्घकालीन विकासबारे छलफल गर्दै मन्त्रीले सहयोग गर्ने प्रतिबद्धता जनाए।
- जनशक्ति अभावका कारण विकासमा समस्या रहेको बताउँदै सुधारको अपेक्षा गरिएको छ।
नेपालगञ्ज : लुम्बिनी प्रदेशका युवा तथा खेलकुद मन्त्री सन्तोष पाण्डे तथा प्रदेश सभा सदस्य अम्बिका काफ्लेले साबिक मध्य–पश्चिमाञ्चल क्षेत्रीय खेलकुद विकास समितिको नेपालगञ्जस्थित भौतिक संरचनाको संयुक्त रूपमा निरीक्षण गरेका छन् ।
निरीक्षणका क्रममा खेलकुद पूर्वाधारको वर्तमान अवस्था, आवश्यक सुधार तथा दीर्घकालीन विकास योजनाबारे विस्तृत छलफल गरिएको समितिका पुर्ब उपाध्यक्ष नरेन्द्र थापाले जानकारी दिए ।
मन्त्री पाण्डेले प्रदेशमा खेलकुद क्षेत्रको समग्र विकासका लागि गुणस्तरीय संरचना निर्माण र प्रभावकारी व्यवस्थापन अत्यावश्यक रहेको बताए ।
मन्त्री पाण्डेले खेलमैदान, प्रशिक्षण स्थल, कबर्ड हल, स्वीमिङ पूल तथा अन्य भौतिक संरचनाको अवस्था अवलोकन गर्दै आवश्यक सुधारका लागि सहयोग गर्ने प्रतिबद्धता जनाएका छन ।
समितिका कार्यालय प्रमुख महेश चन्दले कर्मचारी समायोजन हुन नसक्दा खेलकुद क्षेत्रको बिकासमा अवरोध पुगेको धारणा राखे । खेलकुद क्षेत्रले अझसम्म पनि गणतन्त्रको प्रत्याभूती गर्न नपाएको भन्दै उनले पर्याप्त मात्रामा जनशक्ति नहुँदा खेलकुदको भौतिक पुर्वाधार संरक्षण गर्न कठिनाई भएको दुखेसो पोखे ।
कार्यक्रममा प्रशिक्षण प्रमुख जयन्त श्रेष्ठ, समितिका पुर्ब उपाध्यक्ष थापा, प्राविधिक सल्लाहकार फरमान अली सिद्दिकी ( सोनु ), जिल्ला खेलकुद बिकास समिति बाँकेका कार्यालय प्रमुख सन्तोष श्रेष्ठ, क्रिकेट प्रशिक्षक दिपेन्द्र प्रताप सिंह, प्रशिक्षक कृष्ण चौधरी लगायतको उपस्थिति रहेको थियो ।
यस निरीक्षण तथा अनुगमनले प्रदेशस्तरमा खेलकुद पूर्वाधारको विकास, सुधार र प्रभावकारी सञ्चालनमा महत्वपूर्ण योगदान पुग्ने अपेक्षा गरिएको छ ।
