समाचार सारांश
- असार २७ (जुलाई ११) मा ‘वन ग्लोबल माइल’ अभियानअन्तर्गत नेपालमा ‘कोहलपुर माइल’ दौड आयोजना हुँदैछ।
- १.६०९ किमीको छोटो रोड रेस भएकाले सबै उमेर समूहका लागि सहभागिता सहज हुने आयोजकले जनाएको छ।
- यो दौड नेपालगञ्ज म्याराथन सिरिजअन्तर्गत रही विश्वभर एकैदिन हुने रनिङ अभियानसँग जोडिएको छ।
नेपालगञ्ज : वन ग्लोबल माइल अन्तर्गत आगामी असार २७ गते तद अनुसार जुलाई ११ तारिखमा नेपालमा ‘कोहलपुर माइल’ हुने भएको छ ।
हरेक बर्ष जुलाई ११ मा हुने ‘वन ग्लोबल माइल’ विश्वभर रनिङ संस्कृति प्रवद्र्धन गर्ने महाअभियान हो । ‘एक माइल, एक दिन, एक विश्व’ भन्ने नारासहित यसबर्ष दर्जन बढी देशमा एकैपटक एक माइल (१.६०९किलोमिटर) दौड हुन लागेको हो ।
यसअन्तर्गत नेपालमा कोहलपुर माइल दौड हुन लागेको रेस डाइरेक्टर चन्द्रबहादुर गुरुङले बताए । डेढ किलोमिटरको रोड रेस भएकोले सबै उमेर समुहलाई सहभागितामा सहज हुनेछ ।
रेस नेपालको आयोजनामा हुने यस दौडको व्यवस्थापन नेपालगञ्ज म्याराथन टिमले गर्ने बताईएको छ । अमेरिकाको न्युयोर्कस्थित ह्युडसन माइल बिस्तार हुनेक्रममा वन ग्लोबल माइल बनेको हो ।
वल्र्ड रनिङको साझा संस्था एसोसियसन अफ इन्टरनेसनल म्याराथन एण्ड डिस्टेन्स रेस(एम्स)ले आधिकारिक प्रवद्र्धन गरेको वन ग्लोबल माइल विश्वव्यापी गराउन ह्युड्सन माइलका सहसंस्थापक एवं रन बंग्लाका सिईओ जोन बोका र एम्स दुत एवं धारा नेपालगञ्ज म्याराथनका संस्थापक टीएस ठकुरीको विशेष भुमिका रहेको रेस डाइरेक्टर गुरुङले बताए ।
कोहलपुर माइल पनि नेपालगञ्ज म्याराथन सिरिज अन्तर्गत रहनेछ । यसमा यसअघि नै नेपालगञ्ज १० म्युजिक नाइट रन, काठमाडौं २५ के हेरिटेज रेस, कर्णाली हाफ म्याराथन, गौघाट ग्रीन रन, राप्तीसोनारी नेचर रन लगायत दौड प्रतियोगिता सञ्चालनमा रहेका छन् ।
वन ग्लोबल माइलमा सहभागी हुन एम्सको आवद्धता अपरिहार्य रहेको एम्स दुत टीएस ठकुरीले बताए ।
