काठमाडौ : नेकपा (एमाले) का उपमहासचिव विष्णु रिमालले एघारौं महाधिवेशनको सन्दर्भमा अध्यक्ष केपी शर्मा ओलीको विपक्षमा कोही उभिनुपर्ने कुनै कारण नभएको बताएका छन् । प्रेस चौतारी नेपाल केन्द्रीय कार्यालयमा बिहीबार आयोजित एघारौं राष्ट्रिय महाधिवेशनको सन्दर्भमा संवाद कार्यक्रममा उनले सो कुरा बताएका हुन ।
उपमहासचिव रिमालले भने–‘एघारौं महाधिवेशनको महत्व नेपालको कम्युनिष्ट आन्दोलनलाई बलियो बनाउन मात्र होइन, लोकतन्त्रलाई दीर्घजीवन दिन र नेपालमा रहेको अहिले संघीय लोकतान्त्रिकरणलाई स्थिर बनाउन यो महत्वपूर्ण पक्ष हो भनेर बुझनुपर्छ । यही हिसाबले हेर्दा नेकपा (एमाले) मा अहिले अध्यक्ष ओलीको विपक्षमा कोही उभिनुपर्ने जरुरी म देख्दिनँ ।’
उनले नीति र नेतृत्वमा समस्या नभएका कारण व्यक्तिको फरक शैलीको फरक कारण मात्र चुनाव लड्छु भन्नु उपयुक्त नहुने धारणा राखे । उनले एघारौं महाधिवेशनको सन्दर्भमा नेपालको कम्युनिष्ट आन्दोलनको इतिहास दोहोयाएर हेर्न अनुरोध गर्दै नेतृत्व छनोट लोकप्रिय वा भोट बढी ल्याउने शैलीमा कम्युनिष्ट पार्टीमा सामूहिक नेतृत्व प्रणालीको विकास गर्नेसँग सम्बन्धित रहेको प्रष्ट पारे ।
उनले भने–‘ यसमा को कति पटक नेता हुने ? लोकप्रिय मान्छे नेता बन्नेभन्दा पनि कम्युनिष्ट पार्टीमा नेतृत्व कसले गर्न सक्छ ? भन्ने विषय स्थापित गराउन खोजिरहेका छौं । दोस्रो, धेरै भोट ल्याएकाले नेता हुन सक्छ, चलाउँछ एकल नेतृत्व भन्ने छ भन्दा पनि हामी चाहिँ सामूहिक प्रणालीमा नयाँ नेतृत्व कसरी बसाल्ने भन्नेमा गइरहेका छौं ।’
उनले एघारौं महाधिवेशनपछि पनि अध्यक्षमा केपी शर्मा ओली नै नेतृत्वमा आउने बताए । उनले भने –‘कम्युनिष्ट पार्टीमा नेतृत्व बनाउने भनेको टीम मेकिङको कुरा हो । टीममा एक नम्बर व्यक्तिको बारेमा हामीले फाइनल गरि सकेका छौं । अध्यक्ष केपी ओली हुनु हुनेछ । साथीहरुले लेखेर राख्नुभए पनि हुन्छ । २९ गते महाधिवेशन सम्बोधन भइसकेपछि नेकपा (एमाले) को अध्यक्ष को हुन्छ ? भन्दा केपी शर्मा ओली हुनुहुन्छ । ’
प्रेस चौतारी नेपालका अध्यक्ष गणेश पाण्डेको सभापतित्वमा भएको संवाद कार्यक्रममा प्रचार विभाग प्रमुख राजेन्द्र गौतमको समेत उपस्थिति थियो ।
