नेपालगञ्ज : आगामी फागुन २१ गते हुने प्रतिनिधिसभा सदस्य निर्वाचनका लागि राष्ट्रिय प्रजातन्त्र पार्टी, नेपाल बाँकेले जिल्लाको निर्वाचन क्षेत्र नम्बर २ मा सो पार्टीका केन्द्रीय अध्यक्ष कमल थापाको एकल नाम सिफारिस गरेको छ।
बाँके क्षेत्र नम्बर २ बाट केन्द्रीय अध्यक्ष थापाको एकल नाम सर्वसम्मतिबाट सिफरिस गरिएको जनाउँदै राप्रपा नेपालका सहायक महामन्त्री अभय बस्नेतले बाँकेका स्थानीयको माग अनुसार नै उनको नाम सिफारिस गरिएको बताए ।
उनले बाँके जिल्ला पहिले देखिनै राप्रपाको गढ भएको र यस पटक राप्रपाका नेता धवल शमशेर राणाले निर्वाचन नलड्ने घोषणा गरेकोले राप्रपा नेपालले आफ्नो पार्टीका अध्यक्ष थापालाई यहाँबाट उम्मेदवार बनाउन खोजेको बताए ।
स्थानीय जनताले पनि अध्यक्ष थापाको उम्मेदवारीका लागि विगतबाटै माग गर्दै आएकोमा यस पटक राम्रो अवसर भएकोले नाम सिफारिस गरिएको सहायक महामन्त्री बस्नेतले बताए ।
राप्रपा नेपाल बाँकेका अध्यक्ष दीपेन्द्रबहादुर सिंहले बाँके २ बाट निर्वाचनमा उम्मेदवार बन्न पार्टीका केन्द्रीय अध्यक्ष थापा सकारात्मक भएको पाएको पनि बताए ।
