नेपालगञ्ज : जेनजीको आन्दोलनका क्रममा नापी कार्यालय बाँकेमा गरिएको तोडफोड र आगलागीका कारण अवरुद्ध भएको सेवा बुधबारदेखि पुनःसञ्चालन भएको छ ।
नापी कार्यालय नेपालगञ्ज बाँकेले सार्वजनिक गरेको सूचनामा भौतिक संरचना तथा महत्वपूर्ण कागजातहरू आगलागीमा नष्ट भएकाले केही सेवामा ढिलाइ हुन सक्ने उल्लेख गरिएको छ ।
जारी सुचना अनुसार निल्स र डिजिटल डाटामा सुरक्षित रूपमा प्रविष्ट भएका विवरणका आधारमा सेवा प्रदान गर्न सम्भव हुने भएकाले सेवाग्राहीले सोही अभिलेखमा रहेका विवरण अनुरूप सेवाहरू प्राप्त गर्न सक्नेछन् । तर ती दुवै प्रणालीमा प्रविष्ट नभएका अभिलेखका सेवामा केही समय लाग्न सक्ने बताइएको छ ।
जेनजीको आन्दोलनका क्रममा कार्यालय भवन आंशिक क्षति भएको र प्राविधिक अभिलेख समेत जलेर नष्ट भएको कारण तत्काल सबै सेवा सुचारु गर्न चुनौती भने रहेको नापी कार्यालयका निमित्त कार्यालय प्रमुख राजेन्द्र थापाले बताएका छन् ।
नापी कार्यालय बाँकेका निमित्त कार्यालय प्रमुख थापाले जारी गरेको सूचनामा क्षतिको अवस्थाबाट क्रमशः उकासिँदै सेवा पूर्ण रूपमा सामान्य अवस्थामा ल्याउने प्रयास भइरहेको उल्लेख गरिएको छ । नापी कार्यालयमा सेवा लिनुपर्ने सेवाग्राहीहरूले आवश्यक कागजातसहित तोकिएको मितिदेखि सेवा प्राप्त गर्न सक्ने कार्यालयले जनाएको छ ।
