सुलभको आजै राप्तीको सिद्धनियाघाटमा हज्जारौले गरे बिदाई
नेपालगञ्ज : आन्दोलनका क्रममा काठमाडौमा मृत्यु भएका २ जनाको युवाको शव नेपालगञ्ज ल्याई पुराइएको छ । जेनजी आन्दोलनका क्रममा काठमाडौको बानेश्वर गोली लागेर मृत्यु भएका २ युवाको शव नेपालगञ्ज ल्याइएको छ ।
गत भदौ २३ गते भएको जेनजीको प्रदर्शनमा प्रहरीको गोली लागि ज्यान गुमाएका नेपालगञ्ज– १ का २३ वर्षिय सुलभराज श्रेष्ठ र १९ वर्षिय आयुष थापाको शव बुद्ध एयरमार्फत गृहनगर नेपालगञ्ज ल्याइएको हो ।
शिक्षण अस्पताल महाराजगन्जमा आज विहान पोष्टमार्टम गरिएपछि अपरान्ह शव नेपालगञ्ज ल्याइएको छ । सुलभको आजै हिदू परम्परा अनुसार अन्त्यष्टि गरिने तयारी रहेको छ भने आयुषको भोली शनिबार मात्रै अन्त्यष्टि गरिने जनाइएको छ । आयुषका आफन्तहरु बाहिरबाट आउनुपर्ने भएकाले भोलीमात्रै अन्त्यष्टि गरिने भएको हो ।
सुलभको शव अन्तिम श्रद्धान्जलीपछि नगर परिक्रमासँगै सिधनियाघाट राप्तीनदीमा अन्तिम संस्कार गरिने भएको हो । आन्दोलनमा उनीहरूको मृत्यु भएपछि ५ दिनदेखि परिवार र नेपालगञ्जबासी शोकमा छन् ।
आयुष फिनल्यान्ड जानका लागि केही समय अघि मात्र काठमाडौ पुगेका थिए भने सुलभ काठमाडौमा इन्जिनियरिङ्ग अध्ययन गर्दै आएका थिए । सुलभ शिक्षक नरेन्द्र श्रेष्ठका एकमात्र छोरा हुन् ।
