नेपालगञ्जको ईदगाहमा सामुहिक नमाजपछि ईदको रौनक सुरु

नेपालगञ्ज  : ईस्लामिक धार्मिक पात्रो अनुसार पवित्र महिना रमजानको एक महिनाको लामो कठोर उपबास (रोजा) पछि ईदगाह मस्जिदमा सामुहिक नमाज पढेर सोमबार ‘ईद–उल–फित्र’ ईद मनाउन सुरु गरिएको छ ।

ईस्लामिक धार्मिक पात्रो हिजिरीका अनुसार २९ रोजाको दिन साँझ चन्द्रमा हेरेर अर्कोदिन ईद मनाईने परम्परा छ । मुस्लिम धर्मगुरु तथा मदरसा बरकतियाका प्रधानाध्यापक मौलाना जियाउल मुस्तफा नूरानीले ईस्लामिक धार्मिक पात्रो अनुसार रमजान नवौं महिना भएको र यो महिनाभर आत्मसंयम र शुद्धिका लागि रोजा बसी दशौं महिनाको पहिलो दिन सोबार बिहान ईदगाहमा सामुहिक नमाज पढेर ‘ईद–उल–फित्र’ अर्थात ईद मनाउन सुरु गरिएको जानकारी दिए ।

रमजान सकिएको खुशियालीमा ईदगाहमा सामुहिक रुपमा प्रार्थना गरी एक आपसमा अंकमाल गरी शुभकामना साटासाट गर्ने, ईदको लागि एकसरो नयाँ कपडा वा सफा चोखो कपडा लगाएर नमाज पढेर घरमा मिठो परिकार, सेवाई, दहिवडा, जर्दापुलाउ खाने खुवाउने भएकोले ईदलाई मिठी ईद पनि भन्ने चलन रहेको मौलाना मन्सुर अहमद कादरीको भनाई छ । ईदका लागि आवश्यक किनमेल समेत गर्ने चलन रहेको छ ।

हिजरी संवत अनुसार दशौँ महिना (सौवाल) मा मुसलमान समुदायले विशेष नमाज पाठ गरी ठूलाबडाबाट आशीर्वाद लिएर इद उल फित्र पर्व मनाउँने गरिन्छ । दशौँ महिनाको पहिलो दिन विशेष नमाज पाठ गरेपछि तीन दिनसम्म आफूभन्दा ठूलाबडा कहाँ गएर आशीर्वाद लिने सानालाई आशीर्वाद दिने गरिन्छ ।

यस पर्वको अर्को उल्लेखनीय पक्ष दीनदुःखीलाई दानदिनु हो । यस पर्वमा हरेक मुसलमानले एक वर्ष भित्रको बचतको साढे दुई प्रतिशत नगद वा जिन्सी दान गर्नुपर्ने विधान धर्मग्रन्थ कुरआनमा उल्लेख गरिएको मौलाना नुरानीको भनाई छ ।

यसरी दान गरिएको नगद वा जिन्सी दीनदुःखीलाई बाँडिन्छ जसलाई जकात भनिन्छ । इद उलफित्रमा प्रत्येक व्यक्तिले आफ्नो गच्छे अनुसार गहुँ वा सो बराबरको नगद दान गर्छन् जसलाई फितर भनिन्छ ।

एक महिनासम्म दिनभर व्रत गरेर साँझ सूर्यास्तको नमाज पाठ गरिन्छ । बालबालिका, अशक्त, जेष्ठनागरिक, सुत्केरी र बिरामीलाई रोजा बस्नु पर्दैन । रोजा बस्नेले बिहान सूर्योदय अघि र बेलुकी सूर्यास्तपछि मात्र रमजान महिनामा भोजन गर्छन् ।