नेपालगञ्ज : बाँके राष्ट्रिय निकुञ्जको मध्यवर्ती क्षेत्र दाङ जिल्लाको बबई गाउँपालिका क्षेत्रमा पटक पटक बाघले गोठमै आएर बाख्रा मार्ने गरेको छ । पछिल्लो पटक मंगलबार बाघले बबई गाउँपालिका–२, जहरेबास ट्वाङखोलामा १३ वटा बाख्रा मारेको छ । बबई गाउँपालिका वडा नं. २, जहरेबास ट्वाङखोलाका छविलाल खत्रीका १३ वटा बाख्रा जङ्गलमा चराउन गएको समयमा बाघले मारेको हो ।
खत्रीले भदौ १२ गते स्थानीय सुवाखोरे सामुदायिक वन क्षेत्रमा चरनका लागि लगेका थिए । बबई गाउँपालिका–२ का पूर्ववडाध्यक्ष चिन्तामणि शर्माले बाघले मारेका १३ वटा बाख्रामध्ये नौ वटा मरेको अवस्थामा फेला परेको र बाँकी चार वटा फेला नपरेको बताए ।
बबई गाउँपालिका–५, बबरपुरमा डेढ वर्षअघि मेनका खत्रीका पाँच वटा बाख्रा बाघले गोठमा बाँधेको अवस्थामा मारेको थियो । त्यस्तै बबरपुरकै देवबहादुर वलीका १० वटा बाख्रा खोरभित्रै बाघले मारिदिएको थियो ।
छविलाल खत्रीले दुई वर्षदेखि टीकादेवी बाख्रा फर्म दर्ता गरेर बाख्रापालन गर्दै आएका छन् । एकै पटक १३ वटा बाख्रा बाघले मारिदिँदा तीन लाखभन्दा बढी घाटा भएको खत्रीले बताए । गोठकै बाख्रा बाघले मारिदिँदा क्षतिपूर्तिका लागि निकुञ्ज डिभिजन वन कार्यालयमा निवेदन दिँदासमेत क्षतिको राहत प्राप्त नगरेको किसान देवबहादुर वलीले बताए ।
बबई गाउँपालिकाका अध्यक्ष कुलबहादुर खत्रीले निकुञ्जको मध्यवर्ती क्षेत्रमा पर्ने वडामा बाघले बाख्रा मारेको अवस्थामा क्षतिपूर्तिको व्यवस्थाका लागि पालिकाबाट समन्वय भइरहेको बताए । उनले सामुदायिक वन क्षेत्रमा पहिलो पटक बाघले बाख्रा मारेको हुँदा क्षतिपूर्तिका लागि डिभिजन वन कार्यालयसँग समन्वयन भइरहेको बताए ।
