धनगढी : कञ्चनपुरको बेलौरी नगरपालिका–८ पचुईबाट नियन्त्रणमा लिइएको नरभक्षी बाघलाई शुक्लाफाँटा राष्ट्रिय निकुञ्ज पुर्याइएको छ ।
शुक्रवार सोही ठाउँकी गंगादेवी चन्दलाई बाघले झम्टेर मारेपछि शुक्लाफाँटा र बर्दिया राष्ट्रिय निकुञ्जबाट खटेको प्राविधिक टोलीले शनिवार बिहान बाघलाई नियन्त्रणमा लिएको थियो । नियन्त्रणमा लिइएको बाघलाई शुक्लाफाँटा राष्ट्रिय निकुञ्जस्थित खोरमा राखिएको निकुञ्जका निमित्त प्रमुख संरक्षण अधिकृत रोशनसिंह ठगुन्नाले जानकारी दिए ।
उनका अनुसार बाघलाई शुक्लाफाँटा राष्ट्रिय निकुञ्ज वा कहाँ छाड्ने भनेर निर्णयका लागि विभागलाई पत्राचार गरिएको छ । त्यहाँबाट निर्णय आएपछिमात्रै छोड्ने ठगुन्नाले बताए । नरभक्षी सो बाघ करिब ६ वर्षको पोथी रहेको जनाइएको छ । शुक्रवार खप्टीनाला क्षेत्रमा घाँस काट्न गएकी चन्दलाई झम्टेर झाडीमा लगेको थियो । चन्दसँगै घाँस काट्न गएका अरु महिला भने भागेर ज्यान जोगाएका थिए ।
बाघले बिहान महिलालाई झम्टेर बेपत्ता पारेपछि बाघलाई नियन्त्रणमा लिनका लागि शुक्रवार रातीबाट नै प्राविधिक टोली खटेको थियो । ‘हिजो नै नियन्त्रणमा लिने प्रयास गरिए पनि राति परेकाले सम्भव भएन’, निमित्त प्रमुख संरक्षण अधिकृत ठगुन्नाले भने,‘‘हिजो सम्भव नभएपछि आज बिहानै प्राविधिक टोलीले नियन्त्रणमा लिएको हो ।’’ बाघले झम्टेर लगेको चन्दको शव शनिवार बिहान फेला परिसकेको कञ्चनपुर प्रहरीले जनाएको छ ।
कञ्चनपुरको दक्षिणी क्षेत्रमा चैतदेखि नै बाघको त्रास रहेको थियो। गत चैत १० गते भारतको दुधुवा नेशनल पार्क क्षेत्रमा पुनर्वास नगरपालिका–१० मदन टोलकी कलसा सार्कीको बाघले ज्यान लिएको थियो । त्यसको केही दिन पछिमात्रै कञ्चनपुरको बेलौरी नगरपालिका–१ नजिक रहेको सीमावर्ती भारतीय गाउँ कृष्णनगरकी एक महिलाको पनि बाघले ज्यान लिएको थियो ।
