नेपालगञ्ज : बाँकेमा दादुरा संक्रमित बालबालिकाको संख्या ११५ पुगेको छ । गत पुस दोस्रो सातादेखि बाँकेमा फैलिएको दादुरा संक्रमण पछिल्लो दिनहरूमा झनै फैलिएको हो । नेपालगञ्जका ११३ र पछिल्लो खजुराका २ संक्रमित भेटिएपछि संक्रमितको संख्या ११५ पुगेको जिल्ला स्वास्थ्य कार्यालय बाँकेका खोप सुपरभाइजर नरेश श्रेष्ठले जानकारी दिए ।
खोप सुपरभाइजर श्रेष्ठले भने, ‘नेपालगञ्जका ११३ र पछिल्लो समय खजुरा पनि २ जना संक्रमित भेटिएका छन् यसले गर्दा संक्रमितको संख्या ११५ जना पुगेको छ ।’
श्रेष्ठका अनुसार हाल संक्रमित बालबालिकामध्ये २ जना अस्पताल भर्ना भएर उपचारतर छन् । ५८ जना घरमा आइसोलेसनमा रहेको, ६२ जना उपचाररत रहेको र ५२ जना उपचारपछि निको भएका छन् । यस्तै एकजना बालकको भने संक्रमणबाट मृत्यु भइसकेको पनि उनले बताए ।
दादुरा संक्रमण जिल्लाभर फैलन थालेपछि महामारी लक्षित खोप अभियान सुरु गरिएको समेत श्रेष्ठले बताए । उनका अनुसार हाल नेपालगञ्ज उपमहानगरपालिका अन्तर्गत १, ४, ५, ७, ८, ११, १४, र १५ का ७ वटा वडाका १५ वटा खोप केन्द्र बनाई ६ महिनादेखि १५ वर्ष मुनिका बालबालिकाहरुलाई तीव्र रूपमा खोप लगाइएको छ ।
योसँगै दादुराको महामारी फैलनबाट रोक्न बिहीवार र शुक्रवार नेपालगञ्ज उपमहानगरपालिकाले दुई दिन विद्यालय बन्द गर्ने निर्णय गरेको छ । उपमहानगरपालिकाले सामुदायिक, संस्थागत तथा धार्मिक विद्यालयहरु यही पुष २८ र २९ गते बन्द गर्ने निर्णय गरेको हो ।
