नेपालगञ्ज : नेपालगञ्जका सामुदायिक विद्यालयमा अध्ययनरत विद्यार्थीलाई लक्षित गरी दिवा खाजा कार्यक्रम शुरु गरिएको छ । कोरोना महामारीका कारण विद्यालय बन्द हुँदा रोकिएको खाजा कार्यक्रम नेपालगञ्जका विद्यालयले पुनः शुरु गरेका हुन् ।
दिवा खाजा कार्यक्रम शुरु भएपछि विद्यार्थीहरुको उपस्थिति बढ्ने र विचमै कक्षा छाड्ने प्रवृत्तीमा कमी आउने अपेक्षा रहेको जय जनता माध्यामिक विद्यालय नेपालगञ्ज २० थपुवाका प्रधानाध्यापक रामबहादुर पाण्डेले बताए ।
खाजा कार्यक्रमलाई प्रभावकारी बनाउन विद्यालय व्यवस्थापन समितिले गाउँमा पाईने अर्गानिक पौष्टिक आहारको साप्ताहिक रुपमा खुवाईने तालिका बनाएको जनाइएको छ ।
नेपालगञ्ज उपमहानगरपालिका शिक्षा शाखाले नगरका ४२ वटा सामुदायिक विद्यालयमा दिवा खाजा कार्यक्रम शुरु गरेको छ । दिवा खाजा कार्यक्रमको प्रभावकारीताका लागि नियमितरुपमा अनुगमन गरीरहेको उपमहानगरपालिकाका खेलकुद तथा शिक्षा महाशाखा अधिकृत लोकेन्द्र शाहीले बताए ।
सरकारले देशभरीका सामुदायिक विद्यालयमा शुरु गरेको दिवा खाजा कार्यक्रम बाँकेमा गत फागुनदेखि सञ्चालन भएको थियो ।
