सदरलाइनडटकम,
कैलाली : कैलालीको लम्कीका २१ वर्षीय कोरोना संक्रमित युवक अस्पतालबाट डिस्चार्ज भएका छन् । उनी १६ दिनअघि सेती प्रादेशिक अस्पताल भर्ना भएका थिए । उनको आइतवार अपराह्न डिस्चार्ज गरिएको अस्पतालले जनाएको छ ।
भारतबाट आएका लम्कीचुहा नगरपालिका–९ प्रतापपुरका ती युवकमा चैत २२ गते पिसिआरबाट कोरोना संक्रमणको पुष्टि भएको थियो । दोस्रो र तेस्रो रिपोर्ट नेगेटिभ आएपछि उनलाई डिस्चार्ज गरिएको सेती अस्पतालका आकस्मिक विभाग प्रमुख डाक्टर जगदिश जोशीले बताए ।
उनी भारतको मुम्बईबाट चैत ११ गते नेपाल फर्किएका हुन् । उनलाई लम्की बहुमुखी क्याम्पसको क्वारेन्टाइनमा राखिएको थियो । कोरोना देखिएको १६ दिनमै उनी डिस्चार्ज भएका हुन् । उनी कैलालीको गौरीफन्टा नाका भएर घर फर्किएका थिए । यससँगै नेपालमा कोरोना भाइरस संक्रमण निको भएर डिस्चार्ज हुने उनी चौथो व्यक्ति भएका छन् ।
कोरोनाका विरामी युवक निको भएर डिस्चार्ज
७ बैशाख २०७७, आईतवार १७:३६
