सदरलाइनडटकम,
नेपालगञ्ज : नेपाली काँग्रेसका प्रवक्ता बिश्वप्रकाश शर्माले नेकपाका नेता वामदेव गौतम जुनसुकै निर्वाचन क्षेत्रबाट उठेपनि काँग्रेसनै विजयी हुने दाबी गरेका छन् । नेपाल प्रेस युनियन बाँकेले शनिवार नेपालगञ्जमा गरेको पत्रकार भेटघाटमा उनले नेकपाले कुनै सिट खाली गराएर नेता गौतमलाई प्रतिनिधिसभाको उम्मेदवार बनाएमा बर्तमान सरकारको जनमतको परीक्षण हुने बताए ।
प्रवक्ता शर्माले आर्थिक विकास र समृद्धिमा सरकारको अहिलेनै आलोचना गर्ने समय नभएपनि शान्ति सुरक्षाको सन्दर्भमा भने सरकार कमजोर देखिएको टिप्पणी गरे । दुई तिहाईको बहुमतले प्रधानमन्त्री बलियो नहुने भन्दै उनले कार्यक्षमताले मात्रै प्रधानमन्त्रीलाई साहसी बनाउने जिकिर गरे ।
प्रेस युनियन बाँकेका उपाध्यक्ष कृपाराम बाडियाको अध्यक्षतामा भएको कार्यक्रममा काँग्रेस बाँकेकी सभापति किरण कोइराला, सचिव तप्त पौडेल, प्रदेश सांसद सुरेन्द्र हमाल, नेपालगञ्ज नगर सभापति प्रशान्त विष्टलगायतको उपस्थिती थियो ।
निर्वाचनमा वामदेवलाई पराजित गर्ने काँग्रेस प्रवक्ता शर्माको दाबी
६ आश्विन २०७५, शनिबार १३:५८
